കൊച്ചി: ഇനി എന്നെ കളിയാക്കണ്ടെന്നും യഥാർഥത്തിൽ ഇഡ്ഡലിയും പഴംപൊരിയും കയറ്റുമതിചെയ്യുന്നുണ്ടെന്നും മുഖ്യമന്ത്രി വി.ഡി. സതീശൻ. കൊച്ചിയിൽ നടന്ന അന്താരാഷ്ട്ര സമുദ്ര ദിനാഘോഷത്തിൽ സംസാരിക്കുകയായിരുന്നു മുഖ്യമന്ത്രി. വിഴിഞ്ഞം തുറമുഖവുമായി ബന്ധപ്പെട്ട് നേരത്തെ നടത്തിയ പരാമർശത്തിന്റെ പശ്ചാത്തലത്തിലായിരുന്നു സതീശന്റെ പ്രതികരണം.
വിഴിഞ്ഞത്ത് എക്സിം ഉദ്ഘാടന വേളയിൽ തുറമുഖത്തുനിന്ന് ചരക്കുമായി പുറപ്പെടുന്ന കപ്പലിൽ ഇഡ്ഡലിയും സാമ്പാറും പഴംപൊരിയും ഉണ്ടാകുമെന്ന് മുഖ്യമന്ത്രി പറഞ്ഞത് സമൂഹമാധ്യമങ്ങളിൽ വലിയ ചർച്ചയായിരുന്നു. ഇതിനെതിരായ പരിഹാസങ്ങൾക്കിടെയാണ് യഥാർഥത്തിൽ കേരളത്തിൽനിന്ന് ഇത്തരം ഭക്ഷ്യവസ്തുക്കൾ കയറ്റുമതി ചെയ്യുന്നുണ്ടെന്ന് സതീശൻ പറഞ്ഞത്.
കേരളത്തിലും ഇനി മുതൽ മാരിടൈം ഡേ ആചരിക്കുമെന്ന് മുഖ്യമന്ത്രി പ്രഖ്യാപിച്ചു. ജൂൺ 19 മാരിടൈം ഡേയായി ആഘോഷിക്കും. എല്ലാ വർഷവും മാരിടൈം കോൺക്ലേവ് സംഘടിപ്പിക്കുമെന്നും അദ്ദേഹം വ്യക്തമാക്കി.
അതേസമയം, തിരുവനന്തപുരം മൃഗശാല മാറ്റണമെന്ന നിലപാടിൽ ഉറച്ചുനിൽക്കുന്നതായും സതീശൻ പറഞ്ഞു. മൃഗശാല നിലവിലുള്ള സ്ഥലത്തുനിന്ന് മാറ്റിയശേഷം അവിടെ മാഡിസൺ സ്ക്വയർ മാതൃകയിലുള്ള പദ്ധതി നടപ്പാക്കാനാണ് ലക്ഷ്യമിടുന്നതെന്നും അദ്ദേഹം വ്യക്തമാക്കി. കേരള ട്രാവൽ മാർട്ടിന്റെ ഉദ്ഘാടന വേദിയിലായിരുന്നു മുഖ്യമന്ത്രിയുടെ പ്രഖ്യാപനം.
തിരുവനന്തപുരം മൃഗശാല മാറ്റണമെന്ന ആവശ്യം ആദ്യം ഉന്നയിച്ചത് താനാണെന്നും സതീശൻ പറഞ്ഞു. ഇതിനെ അനുകൂലിച്ചും എതിർത്തും വിവിധ ഭാഗങ്ങളിൽനിന്ന് പ്രതികരണങ്ങൾ ഉയർന്നിരുന്നു. മൃഗശാല മാറ്റാനുള്ള മുഖ്യമന്ത്രിയുടെ നിർദേശത്തെ പ്രതിപക്ഷം എതിർത്തു.
