തിരുവനന്തപുരം: ചേരാനല്ലൂരിൽ 17-കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രികൻ മരിച്ച സംഭവം അതിദാരുണമെന്ന് ആഭ്യന്തരമന്ത്രി രമേശ് ചെന്നിത്തല. സംഭവത്തിൽ പോലീസിന്റെ ഭാഗത്തുനിന്ന് തുടക്കത്തിൽ അപാകതയുണ്ടായെന്നും മന്ത്രി നിയമസഭയിൽ സമ്മതിച്ചു. തട്ടുകട നടത്തി ജീവിച്ചിരുന്നയാളാണ് വാഹനാപകടത്തിൽ മരിച്ചതെന്നും സംഭവത്തിൽ ശക്തമായ നടപടിയുണ്ടാകുമെന്നും അദ്ദേഹം വ്യക്തമാക്കി. പ്രതിപക്ഷ നേതാവ് പിണറായി വിജയൻ വിഷയം സഭയിൽ ഉന്നയിച്ചതിനു പിന്നാലെയായിരുന്നു മന്ത്രിയുടെ പ്രതികരണം.
അപകടത്തെക്കുറിച്ച് അറിഞ്ഞയുടൻ പോലീസ് കമ്മിഷണറോടും ഡിജിപിയോടും വിശദീകരണം തേടിയിരുന്നു. ആദ്യം പോലീസ് സ്വീകരിച്ച നടപടി ശരിയായിരുന്നില്ലെന്നാണ് തന്റെ അഭിപ്രായമെന്നും കേസിൽ ചേർക്കേണ്ട വകുപ്പുകൾ ഉൾപ്പെടുത്താൻ നിർദേശം നൽകിയെന്നും മന്ത്രി പറഞ്ഞു. ഇതിനു പിന്നാലെയാണ് കൂടുതൽ വകുപ്പുകൾ ചുമത്തിയത്. പിന്നീട് പ്രതിയെ ജുവനൈൽ ജസ്റ്റിസ് ബോർഡിന് മുന്നിൽ ഹാജരാക്കിയപ്പോൾ ഉടൻ ജാമ്യം ലഭിച്ചത് ആശ്ചര്യപ്പെടുത്തിയെന്നും മന്ത്രി വ്യക്തമാക്കി. ജാമ്യം റദ്ദാക്കുന്നതിനായി പോലീസ് അപേക്ഷ നൽകുമെന്നും വാഹനത്തിന്റെ ഉടമയായ പ്രതിയുടെ പിതാവിനെതിരെയും കേസെടുക്കുമെന്നും അദ്ദേഹം അറിയിച്ചു. പണക്കാരനെന്നോ പാവപ്പെട്ടവനെന്നോ വ്യത്യാസമില്ലാതെ എല്ലാവർക്കും നീതിയും ന്യായവും ഒരുപോലെയാണെന്നും സർക്കാർ ശക്തമായ നടപടികളുമായി മുന്നോട്ടുപോകുമെന്നും മന്ത്രി കൂട്ടിച്ചേർത്തു.
ചേരാനല്ലൂരിൽ 17-കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രികനായ ജയപാലകൃഷ്ണൻ മരിച്ച സംഭവത്തിൽ പ്രതിയെ രക്ഷിക്കാൻ ശ്രമം നടക്കുന്നതായി കുടുംബം തുടക്കംമുതൽ ആരോപിച്ചിരുന്നു. ശക്തമായ വകുപ്പുകൾ ചുമത്താതിരുന്നതാണ് പ്രതിക്ക് ജാമ്യം ലഭിക്കാൻ കാരണമായതെന്നും കുടുംബം ആരോപിച്ചു. എന്നാൽ, ജുവനൈൽ ജസ്റ്റിസ് നിയമപ്രകാരമാണ് കാറോടിച്ച കൗമാരക്കാരന് ജാമ്യം ലഭിച്ചതെന്നും വാഹനത്തിന്റെ ആർ.സി. ഉടമയായ ജഡ്ജിക്കെതിരേ കേസെടുത്തിട്ടുണ്ടെന്നും പോലീസ് കമ്മിഷണർ വ്യക്തമാക്കിയിരുന്നു. പ്രതിയുടെ ആദ്യ മൊഴിയുടെ അടിസ്ഥാനത്തിലാണ് ആദ്യം കേസ് രജിസ്റ്റർ ചെയ്തതെന്നും പിന്നീട് കൂടുതൽ തെളിവുകളും വിവരങ്ങളും ലഭിച്ചതോടെ അധിക വകുപ്പുകൾ ചുമത്തിയെന്നുമാണ് കമ്മിഷണറുടെ വിശദീകരണം.
