കൊച്ചി: ചേരാനെല്ലൂരിൽ സ്കൂട്ടർ യാത്രികനായ മാഞ്ഞാലി സ്വദേശി ജയബാലകൃഷ്ണൻ കാറിടിച്ച് മരിച്ച കേസിലെ പ്രതിയായ പതിനേഴുകാരന് ജാമ്യം അനുവദിച്ച് ജുവനൈൽ ജസ്റ്റിസ് ബോർഡ്. ആദ്യം 17 കാരനെ ജാമ്യത്തിൽ വിട്ടെങ്കിലും ആഭ്യന്തര മന്ത്രി അമർഷം പ്രകടിപ്പിച്ചതോടെ വീണ്ടും കസ്റ്റഡിയിലെടുക്കുകയായിരുന്നു. തുടർന്ന് ജുവനൈൽ ജസ്റ്റിസ് ബോർഡിനു മുന്നിൽ രാത്രി ഹാജരാക്കി. ജയബാലകൃഷ്ണന്റെ ബന്ധുക്കളും നാട്ടുകാരും പോലീസ് സ്റ്റേഷനിൽ പ്രതിഷേധിച്ചതോടെയും ആഭ്യന്തരമന്ത്രി അമർഷം പ്രകടിപ്പിച്ചതോടെയുമാണ് സ്റ്റേഷൻ ജാമ്യം നൽകി വിട്ടയച്ചിരുന്ന പ്രതിയെ പോലീസ് വീണ്ടും കസ്റ്റഡിയിലെടുത്തത്.
ഇതിനിടെ ബന്ധുക്കളുടെ പ്രതിഷേധം തുടരുകയാണ്. പ്രതിക്ക് ജാമ്യം നൽകിയ തീരുമാനം അംഗീകരിക്കാനാവില്ലെന്ന് ജയബാലകൃഷ്ണന്റെ കുടുംബം പറഞ്ഞു. പ്രതിയെ വീണ്ടും കസ്റ്റഡിയിലെടുക്കണമെന്നും പ്രതി മൈനറാണെങ്കിൽ പിതാവിനെതിരെ നടപടിയെടുക്കണമെന്നുമാണ് ജയബാലകൃഷ്ണന്റെ മക്കൾ ആവശ്യപ്പെട്ടിരുന്നത്. ഇരിങ്ങാലക്കുട അഡീഷനൽ സെഷൻസ് ജഡ്ജിയുടെ മകനാണ് പ്രതിയായ പതിനേഴുകാരൻ. പ്രതിഷേധത്തിനിടെ ജയബാലകൃഷ്ണന്റെ മകൾ കുഴഞ്ഞുവീണു. ഇവരെ ആശുപത്രിയിലേക്ക് മാറ്റി.
അതേസമയം ലൈസൻസില്ലാതെ കാർ ഓടിച്ച് മാഞ്ഞാലി സ്വദേശി ജയബാലകൃഷ്ണന്റെ (55) മരണത്തിനിടയാക്കിയ പതിനേഴുകാരനെതിരെ നേരത്തെ നരഹത്യാക്കുറ്റം ചുമത്തിയിരുന്നു. ഭാരതീയ ന്യായ സംഹിതയിലെ 281, 106 (1) വകുപ്പുകൾ പ്രകാരമാണ് തുടക്കത്തിൽ കേസെടുത്തിരുന്നത്. പതിനേഴുകാരന് ജാമ്യം കിട്ടിയതോടെ ആഭ്യന്തര മന്ത്രി ഡിജിപിയെയും സിറ്റി പോലീസ് കമ്മിഷണറെയും വിളിച്ച് അതൃപ്തി അറിയിച്ചു. ഇതോടെ, നരഹത്യാക്കുറ്റം കൂടി ചുമത്തുകയായിരുന്നു.
