കോഴിക്കോട്: മദ്യപിച്ച് കെഎസ്ആർടിസി ബസിൽ കയറിയ യുവതി കാരണം ബസിന്റെ ഒരു ട്രിപ്പ് മുടങ്ങി. കഴിഞ്ഞ ദിവസം രാവിലെ 11.30ഓടെ വടകര പഴയ ബസ് സ്റ്റാന്റിലായിരുന്നു നാടകീയമായ സംഭവങ്ങൾ അരങ്ങേറിയത്. കണ്ണൂരിൽ നിന്ന് കോഴിക്കോട്ടേക്ക് യാത്ര തിരിച്ച ബസിൽ മാഹിയിൽ വച്ചാണ് യുവതി കയറിയത്. മദ്യപിച്ച് പൂക്കുറ്റിയായ നിലയിൽ ബസിൽ കയറിയ ഇവർ പിൻസീറ്റിൽ ഇരുന്ന് ഉറങ്ങി. വടകരയിലേക്കാണ് ടിക്കറ്റ് എടുത്തതെങ്കിലും കണ്ടക്ടർക്ക് പണം നൽകിയിരുന്നില്ല.
പിന്നീടു വടകര പുതിയ സ്റ്റാന്റിൽ ബസ് എത്തിയപ്പോൾ കണ്ടക്ടർ തട്ടി വിളിച്ചെങ്കിലും യുവതി എഴുന്നേറ്റില്ല. ആളു നന്നായി മദ്യപിച്ചിട്ടുണ്ടെന്ന് ബോധ്യമായതോടെ സമീപത്തുണ്ടായിരുന്ന പോലീസ് എയ്ഡ് പോസ്റ്റിലെ ഉദ്യോഗസ്ഥനെ ബസുകാർ വിവരമറിയിച്ചു. പോലീസ് എത്തി വിളിച്ചിട്ടും ഉണരാതിരുന്നതോടെ സമീപത്തെ സ്റ്റേഷനിൽ നിന്നും വനിതാ പോലീസിനെ എത്തിച്ച് ബസിൽ നിന്നും പിടിച്ചു ഇറക്കുകയായിരുന്നു. അപ്പോഴേക്കും നേരം വൈകിയതിനാൽ ബസിന്റെ ട്രിപ്പും മുടങ്ങി. തുടർന്ന് ബസിലുണ്ടായിരുന്ന യാത്രക്കാരെ മറ്റൊരു ബസിൽ കയറ്റിവിടുകയായിരുന്നു. പെരുവയൽ സ്വദേശിയാണ് യുവതിയെന്ന് മനസിലായതിനെ തുടർന്ന് ഇവരെ പിന്നീട് സ്വകാര്യ ബസിൽ കയറ്റിവിട്ടു.
