പത്തനംതിട്ട: ഒറ്റ ടോസിന്റെ പിൻബലത്തിൽ ശബരിമലയിൽ വിജയം കവർന്നെടുത്ത് എൽഡിഎഫ്. പത്തനംതിട്ട റാന്നി പെരുനാട് ഗ്രാമപഞ്ചായത്തിലെ ശബരിമല വാർഡിലാണ് എൽഡിഎഫിന് ടോസിലൂടെ വിജയം നേടിയത്. ഇവിടെ എൽഡിഎഫ് സ്ഥാനാർത്ഥിക്കും യുഡിഎഫ് സ്ഥാനാർത്ഥിക്കും തുല്യ വോട്ട് ലഭിച്ചതോടെ ടോസ് ഇട്ടാണ് വിജയിയെ തെരഞ്ഞെടുത്തത്. ടോസിൽ എൽഡിഎഫ് സ്ഥാനാർത്ഥി വിജയിക്കുകയായിരുന്നു.
ശബരിമല ക്ഷേത്രം സ്ഥിതി ചെയ്യുന്ന വാർഡിലാണ് എൽഡിഎഫ് അപ്രതീക്ഷിത വിജയമുണ്ടായത്. സിപിഎമ്മിൻറെ സ്ഥാനാർത്ഥി പിഎസ് ഉത്തമനും കോൺഗ്രസിൻറെ അമ്പിളി സുജസിനും 268 വോട്ടുകൾ വീതമാണ് ലഭിച്ചത്. ബിജെപി സ്ഥാനാർത്ഥി രാജേഷിന് 232 വോട്ടുമാണ് നേടാനായത്. ഇതോടെ ടോസിടുകയായിരുന്നു. ടോസ് എൽഡിഎഫിന്റെ ഉത്തമനു വീണു.
അതേസമയം ബിജെപിയുടെ സിറ്റിങ് വാർഡിലാണ് എൽഡിഎഫിൻറെ വിജയം. സിറ്റിങ് വാർഡായ ശബരിമലയിൽ ബിജെപി മൂന്നാം സ്ഥാനത്തേക്ക് പിന്തള്ളപ്പെട്ടു. റാന്നി പെരുനാട് പഞ്ചായത്തിൽ എട്ടു സീറ്റുകളിലാണ് എൽഡിഎഫ് വിജയിച്ചത്. യുഡിഎഫ് നാലു സീറ്റിലും എൻഡിഎ രണ്ടു സീറ്റിലുമാണ് ഇവിടെ വിജയിച്ചത്.
