ന്യൂഡൽഹി: കോൺഗ്രസ് നേതാവ് സോണിയാ ഗാന്ധിയുടെ പുതിയ ഓർമക്കുറിപ്പായ *‘ബിലോങ്ങിങ്: എ ജേണി ഓഫ് ലവ്’*നെതിരെ രൂക്ഷവിമർശനവുമായി ബിജെപി. നെഹ്‌റു-ഗാന്ധി കുടുംബവും കോൺഗ്രസും നടത്തിയ ചരിത്രപരമായ തെറ്റുകൾക്ക് വെള്ളപൂശാനുള്ള ശ്രമമാണ് പുസ്തകത്തിലൂടെ സോണിയ നടത്തുന്നതെന്ന് ബിജെപി വക്താവ് സി.ആർ. കേശവൻ ആരോപിച്ചു.
പുസ്തകത്തിന് ‘ബിലോങ്ങിങ്’ എന്നതിനുപകരം ‘വൈറ്റ്‌വാഷിങ്’ (വെള്ളപൂശൽ) എന്നായിരുന്നു പേരിടേണ്ടിയിരുന്നതെന്ന് കേശവൻ പരിഹസിച്ചു. നെഹ്‌റു-ഗാന്ധി കുടുംബം ചെയ്ത ചരിത്രപരമായ തെറ്റുകളെ മധുരംപുരട്ടി അവതരിപ്പിക്കാനും കോൺഗ്രസ് നടത്തിയ ഗുരുതരമായ വീഴ്ചകൾ മറച്ചുവെക്കാനുമാണ് പുസ്തകത്തിന്റെ ശ്രമമെന്നും അദ്ദേഹം ആരോപിച്ചു.
ബാബ്‌റി മസ്ജിദ് സംഭവത്തിൽ താൻ കരഞ്ഞെന്ന് സോണിയ പറയുന്നുണ്ടെന്നും എന്നാൽ 1984ൽ കോൺഗ്രസ് ഭരണകാലത്ത് ഗുരുദ്വാരകൾ ആക്രമിക്കപ്പെടുകയും ആയിരക്കണക്കിന് നിരപരാധികൾ കൊല്ലപ്പെടുകയും ചെയ്തപ്പോൾ അവർ കണ്ണീരൊഴുക്കിയിരുന്നോയെന്നും കേശവൻ ചോദിച്ചു. ബട്‌ല ഹൗസ് ഏറ്റുമുട്ടലിൽ കൊല്ലപ്പെട്ട ഭീകരർക്കുവേണ്ടിയാണ് സോണിയ കരഞ്ഞതെന്നും അദ്ദേഹം ആരോപിച്ചു.
രാജ്യത്തെ സംരക്ഷിക്കുന്നതിനിടെ രക്തസാക്ഷിത്വം വരിച്ച സി.ആർ.പി.എഫ് ജവാന്മാർക്കുവേണ്ടി സോണിയ ഒരു തുള്ളി കണ്ണീരെങ്കിലും പൊഴിച്ചിരുന്നോയെന്നും 26/11 മുംബൈ ഭീകരാക്രമണത്തിൽ നിരപരാധികൾ കൊല്ലപ്പെട്ടപ്പോൾ അവർ കരഞ്ഞിരുന്നോയെന്നും കേശവൻ ചോദിച്ചു. ഈ ചോദ്യങ്ങൾക്കുള്ള ഉത്തരങ്ങൾ പുസ്തകത്തിലുണ്ടാകുമോയെന്നും അദ്ദേഹം ആരാഞ്ഞു. ഭീകരാക്രമണങ്ങൾക്ക് തിരിച്ചടി നൽകുന്നതിൽ കോൺഗ്രസ് നേതൃത്വത്തിലുള്ള യു.പി.എ സർക്കാർ പരാജയപ്പെട്ടെന്നും കേശവൻ കുറ്റപ്പെടുത്തി.
അടിയന്തരാവസ്ഥ പ്രഖ്യാപിച്ച ഇന്ദിരാ ഗാന്ധിയുടെ നടപടിയെ ന്യായീകരിക്കാനും സാധാരണ നടപടിയായി ചിത്രീകരിക്കാനും സോണിയ ശ്രമിച്ചത് ഞെട്ടിപ്പിക്കുന്നതും അപലപനീയവുമാണെന്നും കേശവൻ ആരോപിച്ചു. ഭരണഘടനയെയും മൗലികാവകാശങ്ങളെയും ഇല്ലാതാക്കിയ നടപടിയായിരുന്നു അടിയന്തരാവസ്ഥയെന്നും അദ്ദേഹം പറഞ്ഞു.
നെഹ്‌റു-ഗാന്ധി കുടുംബത്തിന്റെ നേരിട്ടോ അല്ലാതെയോ ഉള്ള നിയന്ത്രണത്തിൽ 55 വർഷത്തിലേറെ കോൺഗ്രസ് കേന്ദ്രത്തിൽ ഭരണം നടത്തിയെന്നും ഈ കാലയളവിൽ രാജ്യത്തിന്റെ രാഷ്ട്രീയ സംവിധാനത്തിനും ജനാധിപത്യത്തിനും വലിയ ആഘാതമുണ്ടാക്കിയെന്നും കേശവൻ ആരോപിച്ചു. കോൺഗ്രസ് വരുത്തിവെച്ച ചരിത്രപരമായ തെറ്റുകൾ തിരുത്തുന്നതിൽ പ്രധാനമന്ത്രി നരേന്ദ്ര മോദി ഫലപ്രദമായി ഇടപെട്ടെന്നും അദ്ദേഹം കൂട്ടിച്ചേർത്തു.
