കണ്ണൂർ: കണ്ണൂർ വിമാനത്താവളത്തിൽ നിന്ന് പറന്നുയർന്ന എയർ ഇന്ത്യാ വിമാനത്തിൽ പക്ഷിയിടിച്ചു. പക്ഷിയിടിച്ചത് അറിഞ്ഞ പൈലറ്റ് ഉടൻ തന്നെ അടിയന്തരമായി വിമാനം തിരിച്ചിറക്കി. ഇന്ന് രാവിലെ 6.30ന് പുറപ്പെട്ട എയർ ഇന്ത്യയുടെ അബുദാബി വിമാനമാണ് 7.35ഓടെ തിരിച്ചിറക്കിയത്. വിമാനം ടേക്ക് ഓഫ് ചെയ്ത ശേഷമായിരുന്നു സംഭവം. വിമാനം അൽപ്പനേരം ആകാശത്ത് വട്ടമിട്ട് പറന്നശേഷം അനുമതി ലഭിച്ചതോടെ കണ്ണൂർ വിമാനത്താവളത്തിൽ തന്നെ സുരക്ഷിതമായി തിരിച്ചിറക്കി. എയർ ഇന്ത്യയുടെ ബോയിങ് 737-8 എഎൽ വിമാനത്തിലാണ് പക്ഷിയിടിച്ചത്.
വിമാനത്തിലുണ്ടായിരുന്ന യാത്രക്കാരെല്ലാം സുരക്ഷിതരാണ്. തിരിച്ചിറക്കിയ യാത്രക്കാരെ മറ്റൊരു വിമാനത്തിൽ അബുദാബിയിലേക്ക് കൊണ്ടുപോകും. അതേസമയം പക്ഷിയിടിച്ചതിനെതുടർന്ന് വിമാനത്തിന് ചില സാങ്കേതിക തകരാറുണ്ട്. ഈ തകരാർ പരിഹരിച്ച ശേഷമായിരിക്കും വിമാനം അടുത്ത സർവീസ് നടത്തുക.
