പട്ന: ബിഹാറിലെ ജാമുയിയിൽ പ്രായപൂർത്തിയാകാത്ത കുട്ടിയെ ലൈംഗികമായി ഉപദ്രവിച്ച കേസിലെ പ്രതിയെ അറസ്റ്റ് ചെയ്യാനെത്തിയ പോലീസിന് അപ്രതീക്ഷിതമായി മറ്റൊരു കൊലക്കേസ് പ്രതിയെയും പിടികൂടാനായി. പത്താംക്ലാസുകാരിക്കെതിരെ ലൈംഗികാതിക്രം നടത്തിയ കേസിൽ ജാമുയി ഗോപാൽപൂർ സ്വദേശിയായ നന്ദൻ യാദവിനെ അറസ്റ്റ് ചെയ്ത് ഇയാളുടെ മുൻകാല ക്രിമിനൽ പശ്ചാത്തലം പരിശോധിക്കുന്നതിനിടെയാണ് ഇയാളുടെ പിതാവ് ഗനോരി യാദവിന്റെ 23 വർഷം പഴക്കമുള്ള കൊലക്കേസിലെ ബന്ധം പുറത്തുവന്നത്.
നന്ദൻ യാദവിനെ അറസ്റ്റ് ചെയ്ത ശേഷം പോലീസ് നടത്തിയ അന്വേഷണത്തിലാണ് ഇയാളുടെ പിതാവായ ഗനോരി യാദവിനെ 2003ലെ ഇരട്ടക്കൊലക്കേസിൽ പോലീസ് തേടിക്കൊണ്ടിരിക്കുകയാണെന്ന് കണ്ടെത്തിയത്. ചോദ്യം ചെയ്യലിലും രേഖകൾ പരിശോധിച്ചും വിവരങ്ങൾ സ്ഥിരീകരിച്ചതിന് പിന്നാലെ ഗനോരി യാദവിനെ പോലീസ് അറസ്റ്റ് ചെയ്തു. പിന്നീട് ഇയാളെ ജുഡീഷ്യൽ കസ്റ്റഡിയിൽ അയച്ചു.
2003 ഏപ്രിൽ 3നാണ് പ്രതാപ്പൂർ ഗ്രാമത്തിൽ ഡിപി യാദവ്, പുനെ യാദവ് എന്നിവർ കൊല്ലപ്പെട്ടത്. വ്യാപാരവുമായി ബന്ധപ്പെട്ട തർക്കമാണ് കൊലപാതകത്തിന് പിന്നിലെന്നാണ് പോലീസ് പറയുന്നത്. കൊല്ലപ്പെട്ടവരിൽ ഒരാളുടെ അമ്മ നൽകിയ പരാതിയിൽ ഗനോരി യാദവിനെ പ്രതിയാക്കിയിരുന്നു. എന്നാൽ കേസിന് പിന്നാലെ ഇയാൾ ഒളിവിൽ പോകുകയായിരുന്നു. രണ്ട് പതിറ്റാണ്ടിലേറെക്കാലം പോലീസിനെ വെട്ടിച്ച് കഴിഞ്ഞിരുന്ന ഗനോരി യാദവ് ഒടുവിൽ മകൻ മറ്റൊരു കേസിൽ അറസ്റ്റിലായതോടെയാണ് പിടിയിലായത്.
ഇതിനിടെ ജാമുയിയിലെ പ്രായപൂർത്തിയാകാത്ത കുട്ടിയെ ലൈംഗികമായി ഉപദ്രവിച്ച കേസിൽ നന്ദൻ യാദവിനെതിരെ ഗുരുതര ആരോപണങ്ങളാണ് ഉയർന്നത്. പത്താം ക്ലാസ് വിദ്യാർഥിയായ ആൺകുട്ടിയെ ആക്രമിക്കുകയും ഇയാളുടെ പ്രായപൂർത്തിയാകാത്ത സുഹൃത്തിനെ റോഡിൽ വെച്ച് ഉപദ്രവിക്കുകയും ചെയ്ത കേസിലാണ് നന്ദൻ അറസ്റ്റിലായത്. പോലീസ് കസ്റ്റഡിയിൽ നിന്ന് രക്ഷപ്പെടാൻ ശ്രമിച്ചതിനെ തുടർന്ന് നടന്ന ഏറ്റുമുട്ടലിൽ ഇയാളുടെ കാലിൽ വെടിയേറ്റിരുന്നു.
അതേസമയം പത്താം ക്ലാസ് വിദ്യാർഥിയെ ഉപദ്രവിച്ച കേസിൽ ഇതുവരെ അഞ്ച് പേരെയാണ് പോലീസ് അറസ്റ്റ് ചെയ്തത്. രണ്ട് പ്രായപൂർത്തിയാകാത്തവരെയും കസ്റ്റഡിയിലെടുത്തിട്ടുണ്ട്. കേസിലെ പ്രതികളിലൊരാളായ ഹരേരാം യാദവിനെ കോടതിയിൽ ഹാജരാക്കിയപ്പോഴാണ് ഒരു അഭിഭാഷകൻ ഇയാളെ തല്ലിയത്. പ്രതിയെ തല്ലിയ അഭിഭാഷകൻ സംഭവത്തെക്കുറിച്ച് പ്രതികരിച്ചത്, “അഭിഭാഷകരാകുന്നതിന് മുമ്പ് ഞങ്ങൾ മനുഷ്യരാണ്. ഈ സംഭവം ജാമുയിക്ക് അപമാനം വരുത്തിയതിനാലാണ് ഞാൻ ഇയാളെ തല്ലിയത്” എന്നായിരുന്നു.
