കോഴിക്കോട്: തൊണ്ടയിൽ കുപ്പിയുടെ അടപ്പ് കുടുങ്ങി എട്ടുമാസം പ്രായമുള്ള കുഞ്ഞ് മരിച്ചു. പൊക്കുന്ന് അബീന ഹൗസിൽ നിസാറിൻ്റെ മകൻ മുഹമ്മദ് ഇബാദ് ആണ് കഴിഞ്ഞ രാത്രി മരിച്ചത്. കുട്ടിയുടെ മരണത്തിൽ സംശയമുണ്ടെന്നു കാണിച്ച് കുട്ടിയുടെ പിതാവ് പോലീസിൽ പരാതി നൽകി.
പിതാവിൻ്റെ പരാതിയിൽ കോഴിക്കോട് ടൗൺ പൊലീസ് കേസെടുത്തു. ഇവരുടെ 14 ദിവസം പ്രായമുള്ള ആദ്യത്തെ കുഞ്ഞ് മുലപ്പാൽ തൊണ്ടയിൽ കുടുങ്ങി മരിച്ചിരുന്നു. ഇതിനു പിന്നാലെയാണ് രണ്ടാമത്തെ കുഞ്ഞ് അടപ്പ് തൊണ്ടയിൽ കുരുങ്ങി മരിക്കുന്നത്. രണ്ട് കുട്ടികളും മരിച്ചത് ഭാര്യവീട്ടിൽ വച്ചാണ്. ഇതോടെയാണ് ടൗൺ പോലീസിൽ നിസാർ പരാതി നൽകിയത്.
2 വർഷം മുൻപ് 14 ദിവസം മാത്രമുള്ളപ്പോഴാണ് ആദ്യ കുട്ടി മരിച്ചത്. ഇന്നലെ രാത്രിയാണ് രണ്ടാമത്തെ കുട്ടി മരിച്ചത്. കുട്ടിയെ കോട്ടപ്പറമ്പ് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. തുടർന്ന് മൃതദേഹം പോസ്റ്റ്മോർട്ടത്തിനായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. മുമ്പ് കുട്ടി ഓട്ടോറിക്ഷയിൽ നിന്ന് വീണപ്പോഴും ആശുപത്രിയിൽ എത്തിക്കാൻ വൈകിയെന്നും പരാതിയിൽ പറയുന്നു. കേസെടുത്ത് ടൗൺ പോലീസ് അന്വേഷണം ആരംഭിച്ചു.
