ന്യൂഡൽഹി: ഡൽഹി ദേശീയ തലസ്ഥാന മേഖലയിലെ ഹരിയാണയിലെ ഫരീദാബാദിൽ 13കാരിയെ യുവാക്കൾ കൂട്ടബലാത്സംഗത്തിനിരയാക്കിയതായി പരാതി. ഓഗസ്റ്റ് 24നാണ് സംഭവം. പെൺകുട്ടിക്ക് മാനസികപ്രയാസം അനുഭവപ്പെട്ടതിനെ തുടർന്ന് കുടുംബം കാര്യം അന്വേഷിച്ചപ്പോഴാണ് സംഭവം പുറത്തറിയുന്നത്.
കുടുംബത്തിന്റെ പരാതിയിൽ ഫരീദാബാദ് പോലീസ് കേസെടുത്തു. ആറുപേരാണ് കേസിലെ പ്രതികൾ. ഇതിൽ മൂന്നുപേരെ പോലീസ് അറസ്റ്റ് ചെയ്തു. ശേഷിക്കുന്നവർക്കായി അന്വേഷണം തുടരുകയാണ്.
ട്യൂഷൻ ക്ലാസ് കഴിഞ്ഞ് 16കാരനായ ആൺസുഹൃത്തിനൊപ്പം ഗ്രേറ്റർ ഫരീദാബാദ് മേഖലയിലെ ഉപേക്ഷിക്കപ്പെട്ട കെട്ടിടത്തിലേക്ക് പെൺകുട്ടി പോയിരുന്നു. ഇവരെ പിന്തുടർന്നെത്തിയ യുവാക്കൾ പെൺകുട്ടിയെ ലൈംഗികമായി ആക്രമിക്കുകയായിരുന്നുവെന്നാണ് പരാതി. 16കാരനായ ആൺസുഹൃത്തിനെയും ലൈംഗികമായി ഉപദ്രവിച്ചതായി ആരോപണപരാതിയുണ്ട്.
Related Post
പ്രതികളുടെ ഭീഷണിയെ തുടർന്നാണ് കുട്ടികൾ സംഭവത്തെക്കുറിച്ച് ആരോടും പറയാതിരുന്നതെന്നാണ് പോലീസ് പറയുന്നത്. സംഭവത്തിൽ കൂടുതൽ അന്വേഷണം നടക്കുകയാണ്. ശേഷിക്കുന്ന പ്രതികളെ കണ്ടെത്താനുള്ള നടപടികൾ ഊർജിതമാക്കിയതായി പോലീസ് അറിയിച്ചു.
ഡൽഹിയിലും ദേശീയ തലസ്ഥാന മേഖലയിലും സ്ത്രീകൾക്കും കുട്ടികൾക്കുമെതിരായ ലൈംഗികാതിക്രമങ്ങൾ സംബന്ധിച്ച് സുപ്രീംകോടതി ഉൾപ്പെടെ ആശങ്ക രേഖപ്പെടുത്തിയ സാഹചര്യത്തിലാണ് പുതിയ സംഭവം പുറത്തുവന്നത്.
