വിജയകാന്തിന് കോവിഡ്

തമിഴ് നടനും ഡിഎംഡികെ നേതാവുമായ വിജയകാന്തിന് കോവിഡ് 19 സ്ഥിരീകരിച്ചു. സെപ്റ്റംബർ 22 ന് രോ​ഗം സ്ഥിരീകരിച്ച വിജയകാന്തിനെ ചെന്നൈ രാമപുരത്തെ മിയോട്ട് ആശുപത്രിയിൽ പ്രവേശിപ്പിച്ചിരിക്കുകയാണ്.

അദ്ദേഹത്തിന്റെ ആ​രോ​ഗ്യസ്ഥിതിയിൽ ഭയക്കേണ്ടതില്ലെന്നും ഉടനെ തന്നെ രോ​ഗമുക്തി നേടി അദ്ദേഹത്തിന് ആശുപത്രി വിടാനാവുമെന്നും മിയോട്ട് ആശുപത്രി പുറത്തിറക്കിയ പത്രക്കുറിപ്പിൽ പറയുന്നു.

വിജയകാന്തിന് നേരിയ ലക്ഷണങ്ങളേ ഉണ്ടായിരുന്നുള്ളൂവെന്നും ആറ് മാസം കൂടുമ്പോൾ നടത്താറുള്ള മെഡിക്കൽ ചെക്കപ്പിനായാണ് അദ്ദേഹം മിയോട്ട് ആശുപത്രിയിൽ എത്തിയതെന്നും ഡിഎംഡികെ പുറത്തിറക്കിയ പത്രക്കുറിപ്പിൽ പറയുന്നു. ചെറിയ ലക്ഷണങ്ങൾ കണ്ട് പരിശോധിച്ചപ്പോഴാണ് കോവിഡ് സ്ഥിരീകരിച്ചതെന്നും നിലവിൽ ചികിത്സയിൽ തുടരുന്ന വിജകാന്തിന്റെ ആ​രോ​ഗ്യസ്ഥിയിൽ ഭയക്കാനൊന്നുമില്ലെന്നും പാർട്ടിയും പത്രക്കുറിപ്പിൽ വ്യക്തമാക്കുന്നു. ഏറെ നാളായി കരൾ സംബന്ധമായ അസുഖങ്ങൾ അദ്ദേഹത്തെ അലട്ടിയിരുന്നു.

മകൻ ഷൺമുഖ പാണ്ഡ്യൻ സംവിധാനം ചെയ്ത് 2015 ൽ പുറത്തിറങ്ങിയ സാ​ഗപതം എന്ന ചിത്രത്തിലാണ് വിജയകാന്ത് ഒടുവിൽ വേഷമിട്ടത്. ചിത്രത്തിൽ അതിഥി വേഷത്തിലാണ് അദ്ദേഹം എത്തിയത്.