ലഖ്‌നൗ: കൊലക്കേസിൽ ജീവപര്യന്തം തടവിന് ശിക്ഷിക്കപ്പെട്ട മുൻ ബിജെപി നേതാവ് നന്ദ്‌ലാൽ റായ് എന്ന ബബ്ലൂ റായിയുടെ ശിക്ഷ മരവിപ്പിച്ച് അലഹബാദ് ഹൈക്കോടതി. വരാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിൽ മത്സരിക്കാൻ ആഗ്രഹിക്കുന്നുവെന്ന് ചൂണ്ടിക്കാട്ടി നൽകിയ ഹർജിയിലാണ് നടപടി. കേസിലെ കൂട്ടുപ്രതിയും സുഹൃത്തുമായ ശേഷ്നാഥ് ശർമയ്ക്കും കോടതി ഇളവ് അനുവദിച്ചു. ഇരുവരുടെയും ജാമ്യാപേക്ഷ അനുവദിച്ച കോടതി, അപ്പീലിൽ അന്തിമവിധി വരുന്നതുവരെ ശിക്ഷ മരവിപ്പിക്കാനും ഉത്തരവിട്ടു.
രാഷ്ട്രീയക്കാർക്ക് തങ്ങളുടെ മണ്ഡലത്തിലെ ജനങ്ങളോട് പ്രത്യേക ഉത്തരവാദിത്തമുണ്ടെന്നും ശിക്ഷാവിധിക്ക് സ്റ്റേ ലഭിക്കാത്തത് തിരഞ്ഞെടുപ്പിൽ മത്സരിക്കാനുള്ള അവസരം നഷ്ടപ്പെടുത്താൻ ഇടയാക്കുമെന്നും കോടതി നിരീക്ഷിച്ചു. സാധാരണക്കാരന്റെ ഉപജീവനത്തിനുള്ള അവകാശം രാഷ്ട്രീയക്കാരന്റെ തിരഞ്ഞെടുപ്പിൽ മത്സരിക്കാനുള്ള അവകാശത്തേക്കാൾ കുറഞ്ഞ പ്രാധാന്യമുള്ളതല്ലെന്നും കോടതി വ്യക്തമാക്കി.
ജസ്റ്റിസുമാരായ സിദ്ധാർഥ്, വിനയ് കുമാർ ദ്വിവേദി എന്നിവരടങ്ങിയ ഡിവിഷൻ ബെഞ്ച് ഒക്ടോബർ അഞ്ചിനാണ് ഉത്തരവ് പുറപ്പെടുവിച്ചത്. വാരണാസിയിലെ സിഗ്ര പ്രദേശത്ത് 2017 ജനുവരിയിൽ പ്രമോദ് കുമാർ നിഗം എന്നയാളെ വെടിവെച്ചുകൊന്ന കേസിൽ കഴിഞ്ഞ വർഷം ഏപ്രിൽ 15നാണ് വാരണാസി കോടതി നന്ദ്‌ലാൽ റായിക്കും ശേഷ്നാഥ് ശർമയ്ക്കും ജീവപര്യന്തം തടവുശിക്ഷ വിധിച്ചത്.
ശിക്ഷ മരവിപ്പിക്കുന്നതുമായി ബന്ധപ്പെട്ട് സുപ്രീംകോടതി നേരത്തേ പുറപ്പെടുവിച്ച ഉത്തരവുകളും ഹൈക്കോടതി പരിഗണിച്ചു. ഗാസിപൂരിലെ സമാജ്‌വാദി പാർട്ടി എംപി അഫ്സൽ അൻസാരിയുടെ ഹർജിയിൽ സുപ്രീംകോടതി നടത്തിയ നിരീക്ഷണവും ഉത്തരവിൽ പരാമർശിച്ചു. ഒരാളുടെ ശിക്ഷ മരവിപ്പിക്കണമോയെന്ന് തീരുമാനിക്കുമ്പോൾ ആ കേസിന്റെ പ്രത്യേക സാഹചര്യങ്ങൾ പരിശോധിക്കണമെന്നും ശിക്ഷയ്ക്ക് സ്റ്റേ ലഭിക്കാത്തത് അനീതിയിലേക്കോ പരിഹരിക്കാനാകാത്ത പ്രത്യാഘാതങ്ങളിലേക്കോ നയിക്കുമോയെന്ന് വിലയിരുത്തണമെന്നും സുപ്രീംകോടതി വ്യക്തമാക്കിയിരുന്നു.
ഗാസിപൂർ സ്വദേശിയായ നന്ദ്‌ലാൽ റായ് ബിജെപിയുടെ സജീവ പ്രവർത്തകനായിരുന്നുവെന്നും 2017ലെ നിയമസഭാ തിരഞ്ഞെടുപ്പിൽ സ്വന്തം ജില്ലയിൽനിന്ന് മത്സരിക്കാൻ തയ്യാറെടുക്കുകയായിരുന്നുവെന്നും അദ്ദേഹത്തിന്റെ അഭിഭാഷകൻ ദേവേന്ദ്ര ദിയോ ഗുപ്ത ദി ഇന്ത്യൻ എക്സ്പ്രസിനോട് പറഞ്ഞു. വരാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിൽ ഭരണകക്ഷിയുടെ സ്ഥാനാർഥിയായോ സ്വതന്ത്ര സ്ഥാനാർഥിയായോ മത്സരിക്കാനാണ് റായ് ആഗ്രഹിക്കുന്നതെന്ന് ഹർജിയിൽ വ്യക്തമാക്കിയിരുന്നു.
കൊല്ലപ്പെട്ട പ്രമോദ് കുമാർ നിഗത്തിന് അന്ന് ഏകദേശം 51 വയസായിരുന്നു. റായിയുമായി വലിയ തർക്കങ്ങളൊന്നും നിഗത്തിനുണ്ടായിരുന്നില്ലെന്നാണ് അഭിഭാഷകന്റെ വാദം. സിഗ്രയിൽ വഴിയോരക്കച്ചവടക്കാർ വസ്ത്രങ്ങൾ വിൽക്കുന്ന സ്ഥലത്ത് മത്സ്യവിൽപ്പനയുമായി ബന്ധപ്പെട്ട് ഒരിക്കൽ തർക്കമുണ്ടായിരുന്നുവെന്നും അദ്ദേഹം പറഞ്ഞു. മത്സ്യവ്യാപാരവുമായി ബന്ധപ്പെട്ട ബിസിനസായിരുന്നു റായിയുടേത്. വസ്ത്രവിൽപ്പന നടന്നിരുന്ന സ്ഥലത്തിന്റെ സംരക്ഷകനായിരുന്നു നിഗം. എന്നാൽ അന്നത്തെ തർക്കം വലിയ പ്രശ്നമായി മാറിയിരുന്നില്ലെന്നും അഭിഭാഷകൻ അവകാശപ്പെട്ടു.
2017 ജനുവരിയിൽ സിഗ്രയിൽ വെടിയേറ്റാണ് നിഗം കൊല്ലപ്പെട്ടത്. വൈകിട്ട് 7.30ഓടെ മാർക്കറ്റിൽനിന്ന് വീട്ടിലേക്ക് മടങ്ങുന്നതിനിടെ അജ്ഞാതർ വെടിവെച്ചുകൊന്നുവെന്നായിരുന്നു നിഗത്തിന്റെ മകൻ ഹിമാൻഷു നൽകിയ പരാതിയിൽ പറഞ്ഞിരുന്നത്. തുടക്കത്തിൽ അജ്ഞാതർക്കെതിരെയായിരുന്നു കേസ് രജിസ്റ്റർ ചെയ്തത്.
പിന്നീട് 17 ദിവസങ്ങൾക്കുശേഷം രണ്ട് സാക്ഷികളുടെ മൊഴിയുടെ അടിസ്ഥാനത്തിലാണ് റായിയുടെയും സുഹൃത്ത് ശേഷ്നാഥ് ശർമയുടെയും പേരുകൾ കേസിൽ ഉൾപ്പെടുത്തിയതെന്ന് അഭിഭാഷകൻ പറഞ്ഞു. നിഗം നടത്തിയിരുന്ന ശുചിത്വ പ്രവർത്തനമായ ‘സ്വച്ഛത അഭിയാൻ’ നടക്കുന്ന സ്ഥലത്ത് റായ് മൂത്രമൊഴിച്ചതിനെച്ചൊല്ലി ഇരുവരും തമ്മിൽ തർക്കമുണ്ടായെന്നും തുടർന്ന് റായ് വെടിവെച്ച് കൊലപ്പെടുത്തിയെന്നുമാണ് സാക്ഷികൾ ആരോപിച്ചതെന്ന് അഭിഭാഷകൻ വിശദീകരിച്ചു.
വിചാരണക്കോടതി വൈകി പുറത്തുവന്ന മൊഴികളെ നിയമവിരുദ്ധമായി ആശ്രയിച്ചാണ് ശിക്ഷ വിധിച്ചതെന്ന് റായിയുടെ അഭിഭാഷകൻ ഹൈക്കോടതിയിൽ വാദിച്ചു. പ്രോസിക്യൂഷൻ സാക്ഷികളിൽ ഒരാൾ സംഭവത്തിന് നേരിട്ട് സാക്ഷിയായിരുന്നില്ലെന്നും അദ്ദേഹം ചൂണ്ടിക്കാട്ടി. രാഷ്ട്രീയമായി സജീവമായിരുന്ന നിഗത്തിന്റെ കൊലപാതകത്തിൽ സംശയത്തിന്റെയും അനുമാനത്തിന്റെയും അടിസ്ഥാനത്തിലാണ് റായിയെ പ്രതിയാക്കിയതെന്നും പ്രതിഭാഗം വാദിച്ചു.
വിചാരണക്കിടെ മറ്റൊരു സാക്ഷിയും സംഭവം നേരിട്ട് കണ്ടിട്ടില്ലെന്ന് മൊഴി നൽകിയിരുന്നുവെന്ന് അഭിഭാഷകൻ കോടതിയിൽ പറഞ്ഞു. കൊലക്കേസിൽ പ്രതിചേർക്കപ്പെട്ടതിനെത്തുടർന്ന് റായ് ഒന്നര വർഷത്തിലേറെ ജയിലിൽ കഴിഞ്ഞിരുന്നുവെന്നും കഴിഞ്ഞ വർഷം ശിക്ഷിക്കപ്പെട്ടതിനു പിന്നാലെ വീണ്ടും ജയിലിലായെന്നും അഭിഭാഷകൻ വ്യക്തമാക്കി.
വാദങ്ങൾ പരിഗണിച്ച ഹൈക്കോടതി, അപ്പീലിൽ അന്തിമവിധി വരുന്നതുവരെ റായിയുടെ ശിക്ഷയും തടവുശിക്ഷയും മരവിപ്പിക്കേണ്ടതുണ്ടെന്ന് നിരീക്ഷിച്ചു. ഇതോടെയാണ് ജാമ്യം അനുവദിച്ച് ഉത്തരവിട്ടത്. കേസിലെ ശിക്ഷ മരവിപ്പിച്ച കോടതി ഉത്തരവ് തിരഞ്ഞെടുപ്പിൽ മത്സരിക്കാനുള്ള അദ്ദേഹത്തിന്റെ നീക്കത്തിന് നിർണായകമാകുമെന്നാണ് വിലയിരുത്തൽ.
