ലഖ്‌നൗ: സീതാപുരിൽ രജിസ്റ്റർ ചെയ്ത ബലാത്സംഗക്കേസിൽ കോൺഗ്രസ് എംപി രാകേഷ് റാത്തോറിനെ അലഹബാദ് ഹൈക്കോടതിയുടെ ലഖ്‌നൗ ബെഞ്ച് കുറ്റവിമുക്തനാക്കി. പരാതിക്കാരിയും റാത്തോറും തമ്മിൽ ദീർഘകാലമായി പരസ്പര സമ്മതത്തോടെയുള്ള ബന്ധമുണ്ടായിരുന്നുവെന്നാണ് പ്രോസിക്യൂഷൻ ഹാജരാക്കിയ രേഖകൾ സൂചിപ്പിക്കുന്നതെന്ന് കോടതി നിരീക്ഷിച്ചു.
ജസ്റ്റിസ് സുഭാഷ് വിദ്യാർഥി വെള്ളിയാഴ്ച പുറപ്പെടുവിച്ച ഉത്തരവിലാണ് റാത്തോറിനെ കുറ്റവിമുക്തനാക്കിയത്. വിവാഹ വാഗ്ദാനം നൽകി റാത്തോർ പരാതിക്കാരിയുമായി ശാരീരിക ബന്ധത്തിലേർപ്പെട്ടുവെന്ന ആരോപണം, പ്രഥമദൃഷ്ട്യാ കുറ്റം നടന്നുവെന്ന ശക്തമായ സംശയം ഉയർത്തുന്നില്ലെന്നും കോടതി വ്യക്തമാക്കി.
പരാതിക്കാരി റാത്തോറിനെ പൊതുപരിപാടികളിലൂടെയാണ് പരിചയപ്പെട്ടതെന്നാണ് കേസിലെ രേഖകൾ വ്യക്തമാക്കുന്നത്. തുടർന്ന് റാത്തോർ അവർക്ക് രാഷ്ട്രീയ പിന്തുണയും സഖ്യവും വാഗ്ദാനം ചെയ്തതായി പരാതിക്കാരി മൊഴി നൽകിയിരുന്നു. ഈ വാഗ്ദാനം സ്വീകരിച്ചതിന് പിന്നാലെ അവർ ടെയ്‌ലിക് മഹാസംഘിന്റെ ജില്ലാ വനിതാ അധ്യക്ഷയായി നിയമിതയായെന്നും പിന്നീട് ഇരുവരും തമ്മിലുള്ള അടുപ്പം വർധിച്ചെന്നും പരാതിയിൽ പറഞ്ഞിരുന്നു.
പരാതിക്കാരിയുടെ ഭർത്താവിന്റെ മൊഴിയും കോടതി പരിഗണിച്ചു. റാത്തോർ പരാതിക്കാരിയെ പതിവായി തന്റെ വീട്ടിലേക്ക് വിളിക്കാറുണ്ടായിരുന്നെന്നും ചില അവസരങ്ങളിൽ അവർ രാത്രി വൈകുംവരെ അവിടെ തുടരാറുണ്ടായിരുന്നെന്നും ഭർത്താവ് മൊഴി നൽകിയിരുന്നു.
ഇവയെല്ലാം പരിഗണിച്ച കോടതി, “രണ്ട് വിവാഹിതരും പ്രായപൂർത്തിയായവരുമായ വ്യക്തികൾ തമ്മിൽ ദീർഘകാലമായി പരസ്പര സമ്മതത്തോടെയുള്ള വിവാഹേതര ബന്ധമുണ്ടായിരുന്നുവെന്നാണ്” പ്രോസിക്യൂഷൻ രേഖകൾ സൂചിപ്പിക്കുന്നതെന്ന് നിരീക്ഷിച്ചു.
അതേസമയം, പരാതിക്കാരിയുടെ ആരോപണങ്ങളെ പിന്തുണയ്ക്കുന്ന മൊഴികൾ അവരുടെ ഭർത്താവിൽ നിന്നും വിവാഹിതനായ മകനിൽ നിന്നും മരുമകളിൽ നിന്നും ലഭിച്ചിരുന്നുവെന്നും കോടതി ചൂണ്ടിക്കാട്ടി. എന്നാൽ പ്രോസിക്യൂഷൻ അവതരിപ്പിച്ച സംഭവവിവരണത്തിൽ പരസ്പരവിരുദ്ധതകളും അടിസ്ഥാനരഹിതമായ ആരോപണങ്ങളും ഉണ്ടെന്നും സാധാരണ വിവേകമുള്ള ഒരാൾക്ക് അത് അംഗീകരിക്കാൻ കഴിയില്ലെന്നുമായിരുന്നു കോടതിയുടെ വിലയിരുത്തൽ.
അതിനാൽ റാത്തോർ കുറ്റം ചെയ്തുവെന്ന ശക്തമായ സംശയം സൃഷ്ടിക്കുന്ന തരത്തിലുള്ള തെളിവുകൾ നിലവിലില്ലെന്നും കോടതി പറഞ്ഞു. ഇത്തരം പരസ്പരവിരുദ്ധവും അടിസ്ഥാനരഹിതവുമായ ആരോപണങ്ങളുടെ അടിസ്ഥാനത്തിൽ ക്രിമിനൽ നടപടികൾ തുടരുന്നത് നിയമനടപടികളുടെ ദുരുപയോഗത്തിനും നീതി പരാജയപ്പെടുന്നതിനും ഇടയാക്കുമെന്നും കോടതി വ്യക്തമാക്കി.
അതേസമയം 2025 ജനുവരിയിലാണ് പരാതിക്കാരി സീതാപുരിലെ കോട്വാലി പോലീസ് സ്റ്റേഷനിൽ റാത്തോറിനെതിരെ എഫ്ഐആർ രജിസ്റ്റർ ചെയ്തത്. 2020ൽ റാത്തോർ തന്നെ ബലാത്സംഗം ചെയ്തെന്നും പിന്നീട് ഭാര്യയെ വിവാഹമോചനം ചെയ്ത് തന്നെ വിവാഹം കഴിക്കാമെന്ന് ഉറപ്പ് നൽകി ബന്ധം തുടരുകയായിരുന്നുവെന്നുമായിരുന്നു പരാതി.
തുടർന്ന് ഇന്ത്യൻ ശിക്ഷാനിയമത്തിലെ വിവിധ വകുപ്പുകൾ പ്രകാരമാണ് റാത്തോറിനെതിരെ കേസ് രജിസ്റ്റർ ചെയ്തത്. വിചാരണക്കോടതിയിൽ റാത്തോർ ഡിസ്ചാർജ് ഹർജി സമർപ്പിച്ചെങ്കിലും അത് തള്ളുകയും കേസിൽ കുറ്റങ്ങൾ ചുമത്തുകയും ചെയ്തിരുന്നു. 2025 മേയ് 5ന് വിചാരണക്കോടതി പുറപ്പെടുവിച്ച ഉത്തരവ് ഹൈക്കോടതി റദ്ദാക്കി. റാത്തോറിന്റെ ഡിസ്ചാർജ് അപേക്ഷ അനുവദിക്കുകയും ചെയ്തു. കുറ്റങ്ങൾ ചുമത്തിയതിന് ശേഷം പോലും ഡിസ്ചാർജ് നടപടികളുടെ നിയമസാധുത പരിശോധിക്കുന്നതിനുള്ള തന്റെ റിവിഷണൽ അധികാരം ഉപയോഗിക്കുന്നതിന് തടസമില്ലെന്നും അലഹബാദ് ഹൈക്കോടതി വ്യക്തമാക്കി.
