കോഴിക്കോട്: ടിവി പൊട്ടിത്തെറിച്ചുണ്ടായ തീപിടിത്തത്തിൽ വീടിന് വ്യാപക നാശനഷ്ടം. കോഴിക്കോട് പയ്യോളി തുറയൂരിലെ എരുവോട്ട് വയലിൽ താമസിക്കുന്ന മീനാക്ഷിയുടെ വീട്ടിലാണ് സംഭവം. ടിവി പൊട്ടിത്തെറിച്ചതിന്റെ ആഘാതത്തിൽ വീടിന്റെ ചുമരുകളിൽ വിള്ളലുണ്ടായി. വീട്ടിലെ മറ്റ് സാധനസാമഗ്രികളും ഉപയോഗിക്കാനാകാത്ത വിധം നശിച്ചു.
വൈകിട്ട് നാലുമണിയോടെയാണ് സംഭവം. വീട്ടിൽ തനിച്ച് താമസിക്കുന്ന മീനാക്ഷി ടിവി സ്വിച്ച് ഓൺ ചെയ്തതോടെ പുക ഉയരുകയായിരുന്നു. ഉടൻതന്നെ ടിവി ഓഫ് ചെയ്ത് പ്ലഗും ഊരിമാറ്റി. സമീപവാസികളെ വിളിച്ച് വിവരം അറിയിക്കുന്നതിനിടെയാണ് വലിയ ശബ്ദത്തോടെ ടിവി രണ്ടുതവണ പൊട്ടിത്തെറിച്ചത്. പിന്നാലെ തീ പടരുകയും ചെയ്തു.
വിവരമറിഞ്ഞ് അഗ്നിരക്ഷാസേന സ്ഥലത്തെത്തിയപ്പോഴേക്കും നാട്ടുകാർ ചേർന്ന് തീ നിയന്ത്രണവിധേയമാക്കിയിരുന്നു. പൊട്ടിത്തെറിയുടെ ആഘാതത്തിലാണ് വീടിന്റെ ചുമരുകളിൽ വിള്ളലുണ്ടായത്. വീട്ടിലെ മറ്റ് സാധനങ്ങൾക്കും കേടുപാടുകൾ സംഭവിച്ചു. ടിവി പൊട്ടിത്തെറിക്കാനുണ്ടായ കാരണം വ്യക്തമായിട്ടില്ല.
