തിരുവനന്തപുരം: സംസ്ഥാനത്ത് വൈദ്യുതി നിരക്ക് വീണ്ടും വർധിച്ചേക്കും. വൈദ്യുതി നിരക്കിലും സർചാർജുകളിലും വർധനവിന് വഴിയൊരുക്കുന്ന പുതിയ താരിഫ് നയം ഇലക്ട്രിസിറ്റി റെഗുലേറ്ററി കമ്മീഷൻ വിജ്ഞാപനം ചെയ്തു. അടുത്ത അഞ്ച് വർഷത്തേക്കുള്ള നയമാണ് പ്രഖ്യാപിച്ചിരിക്കുന്നത്. അടുത്ത ഏപ്രിൽ മുതൽ നയം പ്രാബല്യത്തിൽ വരുന്നതോടെ സാധാരണക്കാരായ ഉപഭോക്താക്കൾക്ക് വൈദ്യുതി ബില്ലിൽ വലിയ തിരിച്ചടിയുണ്ടാകുമെന്നാണ് സൂചന.
കെ.എസ്.ഇ.ബിയുടെ മുൻകാല നഷ്ടം അയ്യായിരം കോടി രൂപയോളം വരുമെന്നാണ് കണക്കാക്കുന്നത്. ഈ സാമ്പത്തിക ബാധ്യതയും ഹ്രസ്വകാല വൈദ്യുതി കരാറുകളിലെ അധിക ചെലവുകളും ഉപഭോക്താക്കളിലേക്ക് കൈമാറാൻ വഴിയൊരുക്കുന്നതാണ് പുതിയ നയത്തിന്റെ ഘടന. ഇന്ധന സർചാർജ് കൂടി നിരക്കിൽ ഉൾപ്പെടുത്തുന്നതോടെ വൈദ്യുതി ബില്ലിൽ വർധനയുണ്ടാകാനുള്ള സാധ്യതയേറെയാണ്.
വൈദ്യുതി ഉപഭോഗത്തിലെ പീക്ക് സമയത്തിലും മാറ്റം വരുത്തിയിട്ടുണ്ട്. ഇനി വൈകീട്ട് ആറുമണി മുതൽ രാത്രി 11.30 വരെയായിരിക്കും പീക്ക് സമയമായി കണക്കാക്കുക. ഈ സമയങ്ങളിൽ കൂടുതൽ വൈദ്യുതി ഉപയോഗിക്കുന്നവർക്ക് ഉയർന്ന നിരക്ക് ബാധകമായേക്കും. പുതിയ താരിഫ് നയം നടപ്പിലാകുന്നതോടെ വൈദ്യുതി ഉപഭോക്താക്കൾക്ക് സാമ്പത്തിക ബാധ്യത വർധിക്കുമെന്ന ആശങ്ക ശക്തമാണ്.
