ഗാന്ധിനഗർ: ഗുജറാത്തിലെ അമ്രേലി ജില്ലയിൽ സർക്കാർ സ്കൂളിലെ അധ്യാപകൻ നാല് വിദ്യാർത്ഥിനികളെ ലൈംഗികമായി ഉപദ്രവിക്കുകയും ഒരാളെ ബലാത്സംഗം ചെയ്യുകയും ചെയ്തതായി പരാതി. ഗുരുതര ആരോപണത്തിൽ അധ്യാപകനെ പോലീസ് അറസ്റ്റ് ചെയ്തു. പോക്സോ നിയമപ്രകാരവും ബലാത്സംഗക്കുറ്റവും ചുമത്തി ജാഫറാബാദ് ടൗൺ പൊലീസ് സ്റ്റേഷനിൽ വെള്ളിയാഴ്ച കേസെടുത്തതായി രാജുല ഡെപ്യൂട്ടി സൂപ്രണ്ട് ഓഫ് പോലീസ് (ഡിഎസ്‌പി) നയന ഗൊരാഡിയ അറിയിച്ചു.
സംഭവം പുറത്തുവരാൻ കാരണമായത് അമ്രേലി ജില്ലാ ഭരണകൂടത്തിന്റെ ‘മിഷൻ സ്മൈൽ’ പദ്ധതിയുടെ ഭാഗമായി സ്കൂളിൽ സംഘടിപ്പിച്ച ‘ഗുഡ് ടച്ച്, ബാഡ് ടച്ച്’ ബോധവൽക്കരണ ക്ലാസുകളാണെന്ന് ഡിഎസ്‌പി പറഞ്ഞു. വളരെക്കാലമായി പീഡനം തുടർന്നിരുന്നെങ്കിലും ഈ ബോധവൽക്കരണ പരിപാടി വിദ്യാർത്ഥിനികൾക്ക് പരാതി പറയാനുള്ള ധൈര്യം നൽകിയതായി അവർ വ്യക്തമാക്കി. ക്ലാസിനു ശേഷം ലൈംഗികാതിക്രമത്തിനിരയായ വിദ്യാർത്ഥിനി വീട്ടിലെ മാതാപിതാക്കളെ വിവരം അറിയിച്ചതോടെയാണ് സംഭവം പുറത്തറിഞ്ഞത്.
ഉടൻ തന്നെ മാതാപിതാക്കൾ പോലീസിനെ സമീപിക്കുകയായിരുന്നു. തുടർന്ന് സ്റ്റേഷൻ ഹൗസ് ഓഫീസറുടെ നേതൃത്വത്തിലുള്ള പോലീസ് സംഘം സ്കൂളിലെത്തി അന്വേഷണം ആരംഭിച്ചു. പ്രാഥമിക അന്വേഷണത്തിൽ ഞെട്ടിക്കുന്ന വിവരങ്ങളാണ് പുറത്തുവന്നത്. വിദ്യാർത്ഥിനികളോട് ചായ ഉണ്ടാക്കാൻ ആവശ്യപ്പെട്ട് സ്റ്റാഫ് റൂമിലേക്ക് വിളിച്ചുവരുത്തിയ ശേഷം പ്രതി ലൈംഗികമായി പീഡിപ്പിച്ചിരുന്നുവെന്നും, അതിൽ ഒരാളെ ബലാത്സംഗം ചെയ്തതായും അന്വേഷണത്തിൽ കണ്ടെത്തിയതായി ഡിഎസ്‌പി പറഞ്ഞു. പ്രതിയെ അറസ്റ്റ് ചെയ്ത് പൊലീസ് കസ്റ്റഡിയിലെടുത്തിട്ടുണ്ട്. സംഭവത്തിൽ കൂടുതൽ വിദ്യാർത്ഥിനികൾ ഇരകളായിട്ടുണ്ടോ എന്നതടക്കമുള്ള കാര്യങ്ങൾ ഉൾപ്പെടെ വിശദമായ അന്വേഷണം തുടരുകയാണ്.
