ന്യൂഡൽഹി: പൗരന്മാരുടെ മൗലികാവകാശങ്ങൾ സംരക്ഷിക്കാനായി സുപ്രീം കോടതിയെ ആവർത്തിച്ച് സമീപിച്ച് മടുത്തെന്നും ഇനി പരമോന്നത കോടതിയിൽ വലിയ പ്രതീക്ഷയില്ലെന്നും മുതിർന്ന അഭിഭാഷകനും രാജ്യസഭാംഗവുമായ കപിൽ സിബൽ. നിലവിലെ സാഹചര്യത്തിൽ ഭരണഘടനയെ സംരക്ഷിക്കാൻ ശേഷിയുള്ള ഏക സ്ഥാപനം സുപ്രീം കോടതിയാണെങ്കിലും, കോടതിയെ സമീപിച്ച് താൻ തളർന്നുവെന്നും അദ്ദേഹം പറഞ്ഞു.
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനും വോട്ടർ പട്ടികയുടെ പ്രത്യേക തീവ്ര പരിഷ്കരണമായ എസ്.ഐ.ആറിനുമെതിരെ ഡൽഹിയിലെ ജന്തർ മന്തറിൽ നടന്ന പ്രതിഷേധങ്ങൾക്കും പ്രതിഷേധക്കാർക്കെതിരെ പൊലീസ് ഏർപ്പെടുത്തിയ നിയന്ത്രണങ്ങൾക്കും പിന്നാലെ നടത്തിയ വാർത്താസമ്മേളനത്തിലായിരുന്നു സിബലിന്റെ പ്രതികരണം.
വോട്ടർ പട്ടികയിലെ ക്രമക്കേടുകൾ ചൂണ്ടിക്കാട്ടി മാസങ്ങളോളം സുപ്രീം കോടതിയിൽ വാദിച്ചിട്ടും ആശ്വാസം ലഭിച്ചില്ലെന്ന് സിബൽ ആരോപിച്ചു. ലക്ഷക്കണക്കിന് വോട്ടർമാരുടെ പേരുകൾ അന്യായമായി നീക്കം ചെയ്യുകയും പുതിയ പേരുകൾ ഉൾപ്പെടുത്തുകയും ചെയ്തതായും അദ്ദേഹം പറഞ്ഞു. പശ്ചിമ ബംഗാളിലെ അപ്പലേറ്റ് ട്രൈബ്യൂണലുകളിൽ എത്തിയ അപ്പീലുകളിൽ 93 ശതമാനത്തിലും വോട്ടർമാരുടെ പേരുകൾ പുനഃസ്ഥാപിക്കപ്പെട്ടത് പേരുകൾ തെറ്റായി നീക്കം ചെയ്തതിന്റെ തെളിവാണെന്നും ഇക്കാര്യം കോടതിയുടെ ശ്രദ്ധയിൽപ്പെടുത്തിയിട്ടും ഫലപ്രദമായ ഇടപെടലുണ്ടായില്ലെന്നും സിബൽ ചൂണ്ടിക്കാട്ടി.
Related Post
സമാധാനപരമായി പ്രതിഷേധിക്കാനെത്തിയ യുവാക്കളെയും അഭിഭാഷകരെയും ട്രെയിനുകളിലും വിമാനങ്ങളിലുംവെച്ച് പോലും പൊലീസ് നിയമവിരുദ്ധമായി കസ്റ്റഡിയിലെടുക്കുകയാണെന്നും അദ്ദേഹം കുറ്റപ്പെടുത്തി. കർണാടക, പശ്ചിമ ബംഗാൾ, മധ്യപ്രദേശ് എന്നിവിടങ്ങളിൽ നിന്നുള്ള പ്രതിഷേധക്കാരെ ഭാരതീയ നാഗരിക് സുരക്ഷാ സംഹിതയിലെ (ബി.എൻ.എസ്.എസ്.) 163-ാം വകുപ്പ് പ്രകാരം കസ്റ്റഡിയിലെടുത്ത് അജ്ഞാത കേന്ദ്രങ്ങളിലേക്ക് മാറ്റിയെന്നും സിബൽ ആരോപിച്ചു. ഡൽഹിയിലേക്ക് ആളുകൾ എത്തുന്നത് തടയാൻ മെട്രോ സ്റ്റേഷനുകൾ അടയ്ക്കുകയും ട്രെയിനുകൾ റദ്ദാക്കുകയും ചെയ്ത പൊലീസ് നടപടിയെയും അദ്ദേഹം വിമർശിച്ചു.
ചീഫ് ജസ്റ്റിസിനോട് അസംതൃപ്തിയുണ്ടോയെന്ന ചോദ്യത്തിന്, അഭിഭാഷകർ എന്ന നിലയിൽ സംതൃപ്തിയോ അസംതൃപ്തിയോ അല്ല വിഷയമെന്നും അനീതി സംഭവിക്കുമ്പോൾ ജനങ്ങൾക്കുവേണ്ടി കേസ് നടത്തുകയാണ് തങ്ങളുടെ ചുമതലയെന്നും സിബൽ മറുപടി നൽകി. എന്നാൽ വ്യക്തിപരമായ നിലപാടിൽ, സുപ്രീം കോടതിയിൽനിന്ന് ഇനി വലിയ ആശ്വാസമൊന്നും പ്രതീക്ഷിക്കുന്നില്ലെന്നും അദ്ദേഹം കൂട്ടിച്ചേർത്തു.
