ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിൻറെ രാജി ആവശ്യപ്പെട്ട് തലസ്ഥാനത്ത് പ്രതിഷേധിച്ച യുവാക്കളെ കസ്റ്റഡിയിലെടുത്ത നടപടിയിൽ എതിർപ്പ് പ്രകടിപ്പിച്ച് രാഹുൽ ഗാന്ധി. രാജ്യത്ത് നടക്കുന്നത് വോട്ട് മോഷണമാണ്. ഇതിനെതിരെ ഭരണഘടനാപരമായ അവകാശങ്ങൾ ഉപയോഗിച്ച് തെരുവിലിറങ്ങിയ വിദ്യാർഥികളെ പോലീസ് ക്രൂരമായി മർദ്ദിച്ചെന്നും അദ്ദേഹം പറഞ്ഞു.
ഗാന്ധി ജയന്തി ദിനത്തിൽ എക്സിൽ പങ്കുവെച്ച കുറിപ്പിലൂടെയാണ് രാഹുൽ ഗാന്ധി സർക്കാരിനെതിരെ ആഞ്ഞടിച്ചത്. സത്യം പറയുക, സമാധാനപരമായി പോരാടുക എന്നതാണ് ബാപ്പു നമ്മെ പഠിപ്പിച്ചത്. എന്നാൽ ഈ സർക്കാരിനെ ഏറ്റവും കൂടുതൽ ഭയപ്പെടുത്തുന്നതും അതാണ്. കാരണം ഒരു ലാത്തിക്ക് ആൾക്കൂട്ടത്തെ തടയാൻ കഴിഞ്ഞേക്കാം, പക്ഷേ ഒരു ചോദ്യത്തെ തടയാനാകില്ല.
അതുപോലെ ഗ്യാനേഷ് കുമാറിന് പുറത്തുപോകേണ്ടി വരും. അദ്ദേഹത്തെ അവിടെ പ്രതിഷ്ഠിച്ച സിസ്റ്റത്തിനും പോകേണ്ടി വരുമെന്നും രാഹുൽ ഗാന്ധി കൂട്ടിച്ചേർത്തു. അതേസമയം തെരഞ്ഞെടുപ്പ് കമ്മീഷണർക്കെതിരെയുള്ള പ്രതിഷേധം രാജ്യത്തുടനീളം വ്യാപിക്കുകയാണ്. വോട്ടർ പട്ടിക പരിഷ്കരണത്തിലെ ക്രമക്കേടുകൾക്കെതിരെയുള്ള പ്രതിഷേധം കൂടുതൽ ശക്തമാക്കാൻ ഇന്ത്യാ മുന്നണിയും തയാറെടുക്കുകയാണ്. ജയിൽ നിറയ്ക്കൽ സമരവുമായി സിജെപിയും ശക്തമായി രംഗത്തുണ്ട്.
Related Post
