പുണെ: മോട്ടിവേഷണൽ സ്പീക്കറും സോഷ്യൽ മീഡിയ ഇൻഫ്ലുവൻസറുമാണെന്ന് വിശ്വസിപ്പിച്ച് യുവതിയിൽ നിന്ന് നഗ്നചിത്രങ്ങൾ കൈക്കലാക്കിയ 23കാരൻ അറസ്റ്റിൽ. മഹാരാഷ്ട്രയിലെ പുണെയിലാണ് സംഭവം. സംഭവത്തിൽ ദിവ്യ ജിതേന്ദ്ര പർമർ എന്ന യുവാവാണ് അറസ്റ്റിലായത്.
സോഷ്യൽ മീഡിയയിൽ യുവതികളുടെ വിശ്വാസ്യത നേടിയെടുക്കുന്ന തരത്തിൽ വീഡിയോകൾ പോസ്റ്റ് ചെയ്താണ് ഇയാൾ യുവതിയുമായി അടുപ്പം സ്ഥാപിച്ചതെന്ന് പോലീസ് പറഞ്ഞു. മോട്ടിവേഷണൽ സ്പീക്കറെന്ന പേരിൽ യുവതിയെ സോഷ്യൽ മീഡിയ വഴി പരിചയപ്പെട്ട ഇയാൾ പിന്നീട് ആത്മീയ ഗുരുവെന്ന നിലയിലും പെരുമാറി. ഇതിനിടെ യുവതിയുടെ വിശ്വാസം നേടിയെടുത്തതായും 22 കാരി നൽകിയ പരാതിയിൽ പറയുന്നു.
പിന്നാലെ ശരീരത്തിലെ ‘നെഗറ്റീവ് എനർജി’ നീക്കം ചെയ്യുന്നതിനായി നഗ്നചിത്രങ്ങൾ അയച്ചുനൽകണമെന്ന് ഇയാൾ യുവതിയോട് ആവശ്യപ്പെട്ടെന്നാണ് പരാതി. ഇതിനായി ചില ശാരീരിക വ്യായാമങ്ങൾ താൻ പറയുന്ന പോലെ ചെയ്യാൻ നിർദേശിച്ചതായും പോലീസ് പറഞ്ഞു. അതേസമയം യുവതിയുടെ സമ്മതമില്ലാതെ ചിത്രങ്ങൾ കൈക്കലാക്കിയെന്ന പരാതിയിലാണ് കേസ് രജിസ്റ്റർ ചെയ്തത്. സംഭവവുമായി ബന്ധപ്പെട്ട് ഇയാൾ ഉപയോഗിച്ച ലാപ്ടോപ്പും മൊബൈൽ ഫോണും പോലീസ് പിടിച്ചെടുത്തു. ചിത്രങ്ങൾ, സന്ദേശങ്ങൾ, വീഡിയോകൾ എന്നിവയുൾപ്പെടെയുള്ള ഡിജിറ്റൽ തെളിവുകളും അന്വേഷണത്തിന്റെ ഭാഗമായി ശേഖരിച്ചിട്ടുണ്ട്.
Related Post
ഇതേ രീതിയിൽ മറ്റ് യുവതികളെയും ഇയാൾ കെണിയിൽപ്പെടുത്തിയിട്ടുണ്ടോയെന്നും പോലീസ് അന്വേഷിച്ചുവരികയാണ്. ഭാരതീയ ന്യായ സംഹിത (BNS), ഇൻഫർമേഷൻ ടെക്നോളജി ആക്ട് എന്നിവയിലെ വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്.
