ചെന്നൈ: ഫോർട്ട് സെന്റ് ജോർജിൽ നടന്ന സ്വാതന്ത്ര്യദിനാഘോഷ ചടങ്ങിൽ അതിഥിയായി പങ്കെടുത്ത് നടി തൃഷ കൃഷ്ണൻ. തമിഴ്നാട് മുഖ്യമന്ത്രി സി. ജോസഫ് വിജയ് ദേശീയപതാക ഉയർത്തിയ ചടങ്ങിൽ മുൻനിരയിൽ ഇരുന്നാണ് തൃഷ പങ്കെടുത്തത്. ചടങ്ങിൽ നിന്നുള്ള ചിത്രങ്ങളും വീഡിയോകളും ഇപ്പോൾ സമൂഹമാധ്യമങ്ങളിൽ വൈറലാകുകയാണ്.
മഞ്ഞ സാരിയും തലയിൽ മുല്ലപ്പൂവും അണിഞ്ഞാണ് തൃഷ ചടങ്ങിനെത്തിയത്. അമ്മ ഉമാ കൃഷ്ണനൊപ്പമാണ് നടി വേദിയിലെത്തിയത്. മുഖ്യമന്ത്രി വിജയ്‌യുടെ മാതാപിതാക്കളായ എസ്. എ. ചന്ദ്രശേഖറിനും ശോഭാ ചന്ദ്രശേഖറിനും സമീപത്താണ് തൃഷ ഇരുന്നത്.
സ്വാതന്ത്ര്യദിന പരേഡ് കടന്നുപോകുന്നതിനിടെ തൃഷ മുഖ്യമന്ത്രി വിജയ്‌യെ സല്യൂട്ട് ചെയ്യുന്നതും പുറത്തുവന്ന വീഡിയോകളിലുണ്ട്. ഔദ്യോഗിക ചടങ്ങിൽ മുഖ്യമന്ത്രിയുടെ കുടുംബത്തിനൊപ്പം തൃഷ പ്രത്യക്ഷപ്പെട്ടതാണ് ആരാധകരുടെ ശ്രദ്ധ നേടിയത്.
ഇതിനുമുമ്പും വിജയ്‌യുമായി ബന്ധപ്പെട്ട പ്രധാന ചടങ്ങുകളിൽ തൃഷയുടെ സാന്നിധ്യം ശ്രദ്ധേയമായിരുന്നു. കഴിഞ്ഞ മേയിൽ ചെന്നൈയിലെ ജവഹർലാൽ നെഹ്‌റു സ്റ്റേഡിയത്തിൽ നടന്ന വിജയ്‌യുടെ സത്യപ്രതിജ്ഞാ ചടങ്ങിലും തൃഷ മുൻനിരയിൽ ഉണ്ടായിരുന്നു. അന്ന് വിജയ്‌യുടെ അമ്മ ശോഭാ ചന്ദ്രശേഖറെ തൃഷ സ്നേഹപൂർവം ആലിംഗനം ചെയ്തതും വലിയ മാധ്യമശ്രദ്ധ നേടിയിരുന്നു.
വിജയ്‌യും തൃഷയും തമ്മിലുള്ള വ്യക്തിബന്ധത്തെക്കുറിച്ച് അടുത്തിടെ സമൂഹമാധ്യമങ്ങളിൽ പലതരത്തിലുള്ള അഭ്യൂഹങ്ങളും പ്രചരിച്ചിരുന്നു. അതിനിടെയാണ് ഔദ്യോഗിക ചടങ്ങിലും മുഖ്യമന്ത്രിയുടെ കുടുംബത്തോടൊപ്പം തൃഷ വീണ്ടും പ്രത്യക്ഷപ്പെട്ടത്.
എന്നാൽ വിജയ്‌യും തൃഷയും തമ്മിലുള്ള ബന്ധത്തെക്കുറിച്ച് പ്രചരിക്കുന്ന അഭ്യൂഹങ്ങൾക്ക് ഇരുവരും സ്ഥിരീകരണം നൽകിയിട്ടില്ല. വർഷങ്ങളായി തുടരുന്ന സൗഹൃദമാണ് ഇരുവരും തമ്മിലുള്ളതെന്നാണ് പൊതുവെ അറിയപ്പെടുന്നത്. പുതിയ ചടങ്ങിലെ തൃഷയുടെ സാന്നിധ്യം ആരാധകർക്കിടയിൽ വീണ്ടും ചർച്ചയായിരിക്കുകയാണ്.
