ന്യൂഡൽഹി: ബഹിരാകാശത്തിന്റെ ഇരുട്ടിൽ ഭൂമിയും ചന്ദ്രനും ഒരുമിച്ച് ദൃശ്യമാകുന്ന അതിമനോഹരമായ ടൈംലാപ്സ് വീഡിയോ പങ്കുവെച്ച് അന്താരാഷ്ട്ര ബഹിരാകാശ നിലയത്തിലുള്ള പാതി മലയാളിയായ ബഹിരാകാശ സഞ്ചാരി അനിൽ മേനോൻ. ബഹിരാകാശ നിലയത്തിലേക്കുള്ള യാത്രയ്ക്കിടെ സ്പേസ് എക്സിന്റെ ഡ്രാഗൺ പേടകത്തിന്റെ ജനാലയിലൂടെ പകർത്തിയ ദൃശ്യങ്ങളാണ് അനിൽ സോഷ്യൽ മീഡിയയിൽ പങ്കുവെച്ചത്.
ടൈംലാപ്സിന്റെ ഏകദേശം 45-ാം സെക്കൻഡിൽ ഓറിയോൺ നക്ഷത്രസമൂഹം ഉദിക്കുന്നതും കാണാം. ടൈംലാപ്സ് തയ്യാറാക്കുന്നതിനായി ദൃശ്യങ്ങളുടെ വേഗതയിൽ മാറ്റം വരുത്തിയിട്ടുണ്ടെന്നും അനിൽ വ്യക്തമാക്കി.
15 എംഎം ലെൻസും അപ്പേർച്ചർ പ്രയോറിറ്റി മോഡും ഓട്ടോ ഐഎസ്ഒയും ഉപയോഗിച്ചാണ് ദൃശ്യങ്ങൾ പകർത്തിയതെന്നും അദ്ദേഹം സോഷ്യൽ മീഡിയ പോസ്റ്റിൽ കുറിച്ചു.
Related Post
ബഹിരാകാശത്തിന്റെ വിശാലമായ ഇരുട്ടിനിടയിൽ ഒരേ ഫ്രെയിമിൽ ഭൂമിയും ചന്ദ്രനും പ്രത്യക്ഷപ്പെടുന്ന ദൃശ്യം ഏറെ ശ്രദ്ധേയമാണ്. വീഡിയോ സോഷ്യൽ മീഡിയയിൽ ഇതിനകം ശ്രദ്ധ നേടിക്കഴിഞ്ഞു. നിരവധി പേരാണ് ബഹിരാകാശത്തുനിന്നുള്ള അപൂർവ ദൃശ്യം പങ്കുവെച്ചതിന് അനിലിനെ അഭിനന്ദിച്ചത്.
ജൂലൈയിലാണ് അനിൽ മേനോൻ ബഹിരാകാശ നിലയത്തിലെത്തിയത്. ഒറ്റപ്പാലത്ത് കുടുംബവേരുകളുള്ള അനിൽ എമർജൻസി മെഡിസിൻ ഡോക്ടറും മെക്കാനിക്കൽ എൻജിനിയറുമാണ്. കഴിഞ്ഞയാഴ്ച തന്റെ ആദ്യ ബഹിരാകാശ നടത്തവും അദ്ദേഹം വിജയകരമായി പൂർത്തിയാക്കിയിരുന്നു.
ബഹിരാകാശത്തുനിന്നുള്ള നിരവധി മനോഹരമായ ചിത്രങ്ങളും ടൈംലാപ്സ് വീഡിയോകളും അനിൽ നേരത്തെയും പങ്കുവെച്ചിട്ടുണ്ട്. ഏറ്റവും പുതിയ വീഡിയോയും ബഹിരാകാശത്തിന്റെ അപൂർവ സൗന്ദര്യം നേരിൽ കാണുന്നതുപോലെയുള്ള അനുഭവമാണ് സമ്മാനിക്കുന്നത്.
Dragon window on Earth Moonlight Sonata. Orion’s rise at about 0:45 – speeds changed on Timelapse. 15mm Aperture priority and auto ISO from today. pic.twitter.com/vUZXKCtsSG
— Anil Menon (@astro_anil) August 10, 2026
