ന്യൂഡൽഹി: ദക്ഷിണ ഡൽഹിയിലെ മാളവ്യ നഗറിൽ ബഹുനില ഹോട്ടലിൽ വൻ തീപിടിത്തം. അപകടത്തിൽ 21 പേർ മരിച്ചു. 11 പേർക്ക് പൊള്ളലേറ്റതായാണ് വിവരം. ബുധനാഴ്ച രാവിലെയാണ് മാളവ്യ നഗറിലെ ഹൗസ് റാണി പ്രദേശത്തുള്ള ഹോട്ടലിൽ ദുരന്തമുണ്ടായത്. കെട്ടിടത്തിൽ നിന്ന് കനത്ത പുകയും ഉയർന്ന തീജ്വാലകളും ഉയർന്നതോടെ പ്രദേശം പരിഭ്രാന്തിയിലായി.
കെട്ടിടത്തിനുള്ളിൽ കുടുങ്ങിക്കിടന്നവരെ പുറത്തെത്തിക്കാൻ രക്ഷാപ്രവർത്തനം ആരംഭിച്ചു. ഡൽഹി ഫയർ സർവീസിന് (DFS) രാവിലെ 9:45 ഓടെയാണ് അപകടത്തെക്കുറിച്ച് വിവരം ലഭിക്കുന്നത്. തുടർന്ന് വാട്ടർ ടെൻഡറുകളും വാട്ടർ ബൗസറുകളും ദ്രുതകർമ സേനാ വാഹനവും (QRV) ഉൾപ്പെടെയുള്ള അഗ്നിശമന യൂണിറ്റുകൾ സംഭവസ്ഥലത്തേക്ക് എത്തി .
രാവിലെ 8:50 ഓടെയാണ് കെട്ടിടത്തിൽ തീപിടിത്തം ആരംഭിച്ചതെന്ന് ഉദ്യോഗസ്ഥർ വ്യക്തമാക്കി. പത്ത് ഫയർ ഫോഴ്സ് യൂണിറ്റുകൾ മണിക്കൂറുകളോളം ശ്രമിച്ചാണ് തീ നിയന്ത്രണവിധേയമാക്കിയത്. കെട്ടിടത്തിന്റെ ബേസ്മെന്റിൽ കുടുങ്ങിക്കിടന്ന 45 പേരെ ഫയർഫോഴ്സ് ഉദ്യോഗസ്ഥർ സാഹസികമായി രക്ഷപെടുത്തി. പൊള്ളലേറ്റവരുടെ ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ ഡോക്ടർമാരുടെ പരിശോധനയ്ക്ക് ശേഷമേ വ്യക്തമാകൂ. തീപിടിത്തത്തിന്റെ കാരണം കണ്ടെത്താനായിട്ടില്ല.
Related Post
