ഐപിഎല്ലിൽ നിലവിലെ ചാമ്പ്യൻമാരായ കൊൽക്കത്ത നൈറ്റ് റൈഡേഴ്സിനെതിരെ ടോസ് നേടിയ മുംബൈ ഇന്ത്യൻസ് ബൗളിംഗ് തെരഞ്ഞെടുത്തു. റൺസ് ഒഴുകുന്ന വാങ്കഡെ സ്റ്റേഡിയത്തിലാണ് മുംബൈ- കൊൽക്കത്ത മത്സരം. ഈ സീസണിൽ ഇതാദ്യമായാണ് മുംബൈ ഹോം ഗ്രൗണ്ടിൽ കളിക്കാനിറങ്ങുന്നത്‌. ആദ്യത്തെ രണ്ട് മത്സരങ്ങളിലും പരാജയപ്പെട്ട മുംബൈയ്ക്ക് സ്വന്തം തട്ടകത്തിൽ തിരിച്ചുവരവ് നടത്തിയേ മതിയാകൂ. മറുഭാഗത്ത്, ആദ്യ മത്സരത്തിൽ റോയൽ ചലഞ്ചേഴ്സ് ബെംഗളൂരുവിനോട് പരാജയപ്പെട്ടെങ്കിലും രണ്ടാം മത്സരത്തിൽ രാജസ്ഥാൻ റോയൽസിനെ പരാജയപ്പെടുത്തി കൊൽക്കത്ത അക്കൗണ്ട് തുറന്നു കഴിഞ്ഞു.
അതേസമയം അവസാന മത്സരത്തിൽ അസുഖത്തെ തുടർന്ന് വിട്ടുനിന്നിരുന്ന ഓൾ റൗണ്ടർ സുനിൽ നരെയ്ൻ ഇന്ന് മുംബൈയ്ക്ക് എതിരെ കളിക്കും. താരത്തെ പ്ലേയിംഗ് ഇലവനിൽ ഉൾപ്പെടുത്തിയതായി ടോസ് സമയത്ത് നായകൻ അജിങ്ക്യ രഹാനെ വ്യക്തമാക്കി. അതേസമയം, അശ്വനി കുമാർ, മലയാളി താരം വിഘ്നേഷ് പുത്തൂർ എന്നിവരെ പ്ലേയിംഗ് ഇലവനിൽ ഉൾപ്പെടുത്തിയിട്ടുണ്ട്. രോഹിത് ശർമ്മയെ സബ്സ്റ്റിറ്റ്യൂട്ടായാണ് ഉൾപ്പെടുത്തിയിരിക്കുന്നത്.
ടീമുകൾ ഇങ്ങനെ
മുംബൈ ഇന്ത്യൻസ്: റയാൻ റിക്കിൾട്ടൻ, വിൽ ജാക്സ് (വിക്കറ്റ് കീപ്പർ), സൂര്യകുമാർ യാദവ്, തിലക് വർമ, ഹാർദിക് പാണ്ഡ്യ (ക്യാപ്റ്റൻ), നമാൻ ധിർ, മിച്ചൽ സാന്റ്നർ, ദീപക് ചാഹർ, ട്രെന്റ് ബോൾട്ട്, അശ്വിനി കുമാർ, വിഘ്നേഷ് പുത്തൂർ
കൊൽക്കത്ത നൈറ്റ് റൈഡേഴ്സ്: ക്വിന്റൻ ഡികോക്ക് (വിക്കറ്റ് കീപ്പർ), സുനിൽ നരെയ്ൻ, വെങ്കടേഷ് അയ്യർ, അജിൻക്യ രഹാനെ (ക്യാപ്റ്റൻ), റിങ്കു സിങ്, ആൻക്രിഷ് രഘുവംശി, ആന്ദ്രെ റസ്സൽ, രമൺദീപ് സിങ്, സ്പെൻസർ ജോൺസൻ, ഹർഷിത് റാണ, വരുൺ ചക്രവർത്തി
