ന്യൂഡൽഹി: പരോളിൽ ഇറങ്ങി മുങ്ങിയ കാലത്തു കംബോഡിയയിൽ വച്ചു പരിചയപ്പെട്ട കാമുകിയെ വിവാഹം കഴിക്കാൻ ഹരിയാനയിലെ കൊടുംകുറ്റവാളി മെയ്ൻപാൽ ധില്ലയ്ക്ക് (45) പഞ്ചാബ്– ഹരിയാന ഹൈക്കോടതി 12 മണിക്കൂർ പരോൾ അനുവദിച്ചു. ജജ്ജർ – ഗുരുഗ്രാം റോഡിലെ ഫാം ഹൗസിലായിരുന്നു വിവാഹം. മൂന്നു കൊലപാതകക്കേസുകളിൽ ശിക്ഷിക്കപ്പെട്ടു ഹിസാർ സെൻട്രൽ ജയിലിൽ കഴിയുന്ന ധില്ല കനത്ത പൊലീസ് കാവലിലാണു കല്യാണ മണ്ഡപത്തിലെത്തിയത്. കൊലപാതകം ഉൾപ്പെടെ 22 കേസുകളിൽ പ്രതിയായിരുന്ന ധില്ല 2018ലാണു പരോളിലിറങ്ങി മുങ്ങിയത്.
പിന്നീടു വ്യാജ രേഖകൾ ഉണ്ടാക്കി കംബോഡിയയിലേക്കു കടന്നു. അവിടെ വച്ചാണു മെറ്റ ചാൻ എന്ന കംബോഡിയൻ യുവതിയെ പരിചയപ്പെടുന്നത്. പിന്നീട് അവിടെ ലിവിങ് ടുഗ്ദർ ജീവിതം നയിച്ച ഇവർക്കു മൂന്നു കുട്ടികളുമുണ്ട്. മക്കളും ഇന്നലെ വിവാഹത്തിനെത്തിയിരുന്നു. ചടങ്ങിൽ അഞ്ഞൂറിലേറെപ്പേർ പങ്കെടുത്തെന്നാണു വിവരം. കംബോഡിയിലേക്കു കടന്ന ധില്ല സിയം റീപ് എന്ന സ്ഥലത്തു നൈറ്റ് ക്ലബ് നടത്തുകയായിരുന്നു.
അവിടെ പൗരത്വം നേടാൻ ശ്രമിക്കുന്നതിനിടെയാണു സിബിഐ ഇടപെടലിനെത്തുടർന്നു കഴിഞ്ഞ വർഷം ഇന്ത്യയിലേക്കു നാടുകടത്തിയത്. 2019ൽ ധില്ലയെക്കുറിച്ചുള്ള വിവരം നൽകുന്നവർക്കു ഹരിയാന പൊലീസ് 5 ലക്ഷം രൂപ പാരിതോഷികം പ്രഖ്യാപിച്ചിരുന്നു. പിന്നാലെ ഇന്റർപോൾ റെഡ് കോർണർ നോട്ടിസുമിറക്കി.
Related Post
