മുംബൈ: ഇന്ത്യൻ ക്രിക്കറ്റ് ടീം നായകൻ രോഹിത് ശർമയ്ക്കും ഭാര്യ റിതിക സാജ്ദേയ്ക്കും ആൺകുഞ്ഞ് പിറന്നു. വെള്ളിയാഴ്ച മുംബൈയിലാണ് രോഹിത് – റിതിക ദമ്പതികളുടെ രണ്ടാമത്തെ കുഞ്ഞിന്റെ ജനനം. രോഹിത്തുമായി അടുത്ത വൃത്തങ്ങളെ ഉദ്ധരിച്ച് ദേശീയ മാധ്യമങ്ങളാണ് ഇക്കാര്യം റിപ്പോർട്ട് ചെയ്തിരിക്കുന്നത്. വെള്ളിയാഴ്ച മുംബൈയിലെ ആശുപത്രിയിലാണ് ഇരുവർക്കും ആൺകുഞ്ഞ് പിറന്നത്.
മാധ്യമങ്ങൾ റിപ്പോർട്ട് ചെയ്തെങ്കിലും രോഹിത് – റിതിക ദമ്പതികൾ ഇക്കാര്യം ഔദ്യോഗികമായി പ്രഖ്യാപിച്ചിട്ടില്ല. ഇരുവരുടെയും ആദ്യ മകൾ സമൈറയുടെ ജനനം 2018-ലായിരുന്നു.
ഇന്ത്യൻ ടെസ്റ്റ് ടീം നായകൻ കൂടിയായ രോഹിത് ശർമ, കുഞ്ഞിന്റെ ജനനവുമായി ബന്ധപ്പെട്ട തിരക്കുകൾ കാരണം ഓസ്ട്രേലിയൻ പര്യടനത്തിനായി പുറപ്പെട്ട ഇന്ത്യൻ ടീമിനൊപ്പം പോയിരുന്നില്ല.
വ്യക്തിപരമായ കാരണങ്ങളാൽ രോഹിത്തിന് ഒന്നാം ക്രിക്കറ്റ് ടെസ്റ്റിൽ കളിക്കാൻ സാധിച്ചേക്കില്ലെന്ന് ഇന്ത്യൻ പരിശീലകൻ ഗൗതം ഗംഭീറും വെളിപ്പെടുത്തിയിരുന്നു. എന്നാൽ രോഹിത് പെർത്തിൽ നടക്കുന്ന ഓസ്ട്രേലിയയ്‌ക്കെതിരായ ഒന്നാം ക്രിക്കറ്റ് ടെസ്റ്റിൽ കളിക്കാനുള്ള സാധ്യതയുണ്ടെന്നും സൂചനകളുണ്ട്.
