മലപ്പുറം: സ്കൂളിലെ ലഹരി ഉപയോഗത്തെക്കുറിച്ച് അധ്യാപകർക്ക് വിവരം നൽകിയ പത്താം ക്ലാസ് വിദ്യാർഥിക്ക് നേരെ ആക്രമണം. ബൈക്കിലെത്തിയ അജ്ഞാത സംഘം വിദ്യാർഥിയുടെ തലയ്ക്ക് അടിച്ച് പരിക്കേൽപ്പിച്ചതായാണ് പരാതി. പെരിന്തൽമണ്ണ ആനമങ്ങാട് ഗവ. ഹയർ സെക്കൻഡറി സ്കൂളിലെ വിദ്യാർഥിക്കാണ് മർദനമേറ്റത്. സംഭവത്തിൽ വിദ്യാർഥിയുടെ രക്ഷിതാക്കൾ പെരിന്തൽമണ്ണ പൊലീസിൽ പരാതി നൽകി.
പാലൊളിപറമ്പിലെ മാതാവിന്റെ വീട്ടിൽനിന്ന് സ്കൂളിലേക്ക് നടന്നുപോകുന്നതിനിടെയാണ് വിദ്യാർഥിക്ക് നേരെ ആക്രമണമുണ്ടായത്. പിന്നാലെയെത്തിയ ബൈക്ക് സംഘം വിദ്യാർഥിയെ തടഞ്ഞുനിർത്തി തലയ്ക്ക് അടിക്കുകയായിരുന്നു. തലയിലും ശരീരത്തിന്റെ വിവിധ ഭാഗങ്ങളിലും പരിക്കേറ്റ വിദ്യാർഥി പെരിന്തൽമണ്ണ ജില്ലാ ആശുപത്രിയിൽ ചികിത്സ തേടി.
ഹെൽമറ്റ് ധരിച്ചെത്തിയവരായതിനാൽ അക്രമികളെ തിരിച്ചറിയാൻ കഴിഞ്ഞിട്ടില്ലെന്നാണ് വിദ്യാർഥി അറിയിച്ചത്. സ്കൂളിലെ ചില വിദ്യാർഥികൾ ലഹരി ഉപയോഗിക്കുന്നതായി ശ്രദ്ധയിൽപ്പെട്ടതിനെ തുടർന്ന് ഇക്കാര്യം അധ്യാപകരെ അറിയിച്ചിരുന്നുവെന്നും അതിനു പിന്നാലെ ഭീഷണി നേരിട്ടിരുന്നുവെന്നും പരാതിയിൽ പറയുന്നു.
ലഹരി ഉപയോഗത്തെക്കുറിച്ച് വിവരം നൽകിയതിലുള്ള വിരോധമാണോ ആക്രമണത്തിനു പിന്നിലെന്ന സംശയം ഉയർന്നിട്ടുണ്ട്. എന്നാൽ, ആക്രമണത്തിനു പിന്നിൽ ആരാണെന്നോ യഥാർഥ കാരണം എന്താണെന്നോ ഇതുവരെ വ്യക്തമായിട്ടില്ല. സംഭവത്തിൽ പൊലീസ് അന്വേഷണം ആവശ്യമാണ്.
