നയൻതാര- ധനുഷ് വവാദങ്ങൾക്കിടെ നയൻതാരയുടെ ‘വിവാഹ’ ഡോക്യുമെന്ററി സ്ട്രീമിങ് ആരംഭിച്ചു. ഒടിടി പ്ലാറ്റ്‌ഫോമായ നെറ്റ്ഫ്‌ളിക്‌സിലാണ് ‘നയൻതാര: ബിയോണ്ട് ദി ഫെയറി ടെയിൽ’ റിലീസ് ചെയ്തത്. നയൻതാരയുടെ പിറന്നാൾ ദിനത്തിൽ ദിനത്തിൽ പുറത്തിറക്കിയ ഡോക്യുമെന്ററിയിൽ വിവാദങ്ങൾക്ക് കാരണമായ നാനും റൗഡി താൻ ചിത്രത്തിലെ ബിഹൈൻഡ് ദി സീൻസ് ദൃശ്യങ്ങളും ഉൾപ്പെടുത്തിയിട്ടുണ്ട്.
ഡോക്യുമെന്ററി നയൻതാരയുടെ വിവാഹത്തിൽ മാത്രം ഒതുങ്ങി നിൽക്കാതെ ജീവിത കഥ പറഞ്ഞുപോകുന്നുണ്ട്. 1.22 മണിക്കൂറാണ് ഡോക്യുമെന്ററിയുടെ ദൈർഘ്യം. അമിത് കൃഷ്ണനാണ് സംവിധാനം. ഗൗതം വാസുദേവ മേനോന്റെ പേരാണ് നേരത്തെ സംവിധായകസ്ഥാനത്ത് കേട്ടിരുന്നത്.
സിനിമാ ജീവിതത്തിന്റെ തുടക്കം മുതൽ മക്കളുടെ വിശേഷങ്ങൾ വരെയാണ് ഡോക്യുമെന്ററിയിലുള്ളത്. വിവാഹത്തിന്റെ ഇതുവരെ പുറത്തുവരാത്ത ദൃശ്യങ്ങളും ഡോക്യുമെന്ററിയിലുണ്ട്. നയൻതാരയുടെ 40-ാം പിറന്നാളിനാണ് നെറ്റ്ഫ്ലിക്സിൽ കൂടി ഡോക്യുമെന്ററി റിലീസ് ചെയ്തത്.
ഡോക്യുമെന്ററിയിലെ ഒരു ഭാഗത്തെ ചൊല്ലി ധനുഷുമായി വലിയ വിവാദമുണ്ടായിരുന്നു. നയൻതാരയുടെ പങ്കാളി വിഘ്‌നേഷ് ശിവൻ സംവിധാനം ചെയ്ത ‘നാനും റൗഡി താൻ’ എന്ന ചിത്രത്തിലെ അണിയറ ദൃശ്യങ്ങൾ ഡോക്യുമെന്ററിയുടെ ടീസറിലുണ്ടായിരുന്നു. ഇത് ഉപയോഗിച്ചതിനെതിരെ ഈ ചിത്രത്തിന്റെ നിർമാതാവ് ധനുഷ് വക്കീൽ നോട്ടീസ് അയച്ചു. ഇതിന് നയൻതാര നൽകിയ മറുപടി വലിയ വിവാദമായിരുന്നു. നയൻതാരയ്ക്ക് പിന്തുണയുമായി നിരവധി താരങ്ങളും രംഗത്തെത്തിയിരുന്നു.
