കൊച്ചി: ഹൈക്കോടതി ജസ്റ്റിസ് ദേവൻ രാമചന്ദ്രനെതിരെ സൈബർ ആക്രമണം നടത്തിയ പി.കെ.സുരേഷ് കുമാർ എന്നയാളിന്റെ ഫെയ്സ്ബുക്ക് അക്കൗണ്ട് പൊലീസ് മരവിപ്പിച്ചു. ദേവൻ രാമചന്ദ്രനെതിരെ നടന്ന സൈബർ ആക്രമണത്തിനു നടപടി ആവശ്യപ്പെട്ട് ഹൈക്കോടതി അഭിഭാഷകനും പൊതു പ്രവർത്തകനുമായ കുളത്തൂർ ജയ്സിങ് നൽകിയ പരാതിയുടെ അടിസ്ഥാനത്തിലാണു കൊച്ചി സൈബർ ക്രൈം പൊലീസ് സ്റ്റേഷനിൽ കേസ് റജിസ്റ്റർ ചെയ്തത്. അന്വേഷണം തുടരുന്നതിനിടെ സുരേഷ് കുമാറിന്റെ ഫെയ്സ്ബുക്ക് അക്കൗണ്ട് പൊലീസ് മരവിപ്പിക്കുകയായിരുന്നു.
പൊലീസ് കേസ് എടുത്തതിനു ശേഷവും ദേവൻ രാമചന്ദ്രനെതിരെ ഫെയ്സ്ബുക്ക് പേജിൽ പോസ്റ്റുകൾ വന്നിരുന്നുവെന്നാണ് പരാതിക്കാരൻ പറയുന്നത്. വിധിന്യായം പുറപ്പെടുവിച്ചതിന്റെ പേരിലോ പങ്കെടുക്കുന്ന ചടങ്ങുകളുടെ പേരിലോ കോടതി ജഡ്ജിമാരെ അധിഷേപിക്കാൻ പൗരന് നിയമം അനുവാദം നൽകുന്നില്ലെന്നും പി.കെ. സുരേഷ് കുമാറിനെതിരെ കർശന നിയമ നടപടി ഉടൻ വേണമെന്നും പരാതിയിൽ ആവശ്യപ്പെടുന്നുണ്ട്.
സൈബർ അധിക്ഷേപത്തിൻ്റെ പേരിൽ കഴിഞ്ഞ കുറച്ച് ദിവസങ്ങളായി കർശന നടപടി സ്വീകരിച്ചു വരികയാണ് കേരള പൊലീസ്. നടി ഹണി റോസിനെ അധിക്ഷേപിച്ച നിരവധി പേർക്കെതിരേ കേസെടുക്കുകയും ബോബി ചെമ്മണ്ണൂരിനെ അറസ്റ്റ് ചെയ്തി ജയിലലടയ്ക്കുകയും ചെയ്തിരുന്നു. ഒറ്റ ദിവസം കൊണ്ട് തന്ത്രപരമായ നീക്കത്തിലൂടെയാണ് ബോബി കസ്റ്റഡിയിൽ ആയത്. പൊലീസ് കയ്യടി നേടുകയും ചെയ്തു.
Related Post
