ഡ്രൈവർ മദ്യപിച്ച് നേരെ നിൽക്കാൻ പറ്റാത്ത അവസ്ഥയിൽ, ലൈസൻസില്ലാതെ ലോറിയോടിച്ചത് ക്ലീനർ, ഇയാളും മദ്യ ലഹരിയിൽ, ലോറി ഉറങ്ങിക്കിടന്നവർക്കിടയിലേക്ക് പാഞ്ഞുകയറിയത് മൂന്നര ടണ്ണോളം ഭാരമുള്ള ലോഡുമായി

നാട്ടിക: തൃശ്ശൂരിൽ തടിലോറി പാഞ്ഞുകയറി ഉറങ്ങിക്കിടന്ന നാടോടി സംഘത്തിലെ അഞ്ചുപേർ ദാരുണമായി മരിച്ച സംഭവത്തിൽ കൂടുതൽ വിവരങ്ങൾ പുറത്ത്. ഡ്രൈവർ മദ്യപിച്ച് നേരെ നിൽക്കാൻ പറ്റാത്ത അവസ്ഥയിലായിരുന്നതിനാൽ വാഹനം ഓടിച്ചത് ലോറിയിലെ ക്ലീനറാണെന്ന് കണ്ടെത്തൽ. മാത്രമല്ല വാഹനമോടിക്കുമ്പോൾ ഇയാളും മദ്യലഹരിയിലായിരിന്നെന്നുമാണ് പുറത്തുവരുന്ന വിവരം. മാത്രമല്ല ക്ലീനർക്ക് ലോറി ഓടിക്കാനുള്ള ഹെവി ലൈസൻസുണ്ടായിരുന്നില്ല. രണ്ടുപേരെയും പോലീസ് കസ്റ്റഡിയിലെടുത്തിട്ടുണ്ട്.

കണ്ണൂർ ആലക്കോട് സ്വദേശികളായ ഏഴിയക്കുന്നിൽ അലക്സ് (33), ചാമക്കാലച്ചിറ ജോസ് (54) എന്നിവരാണ് ലോറിയുമായി ഉറങ്ങിക്കിടന്നവർക്കിടയിലേക്ക് പാഞ്ഞുകയറിയത്. അലക്‌സ് ലോറിയിലെ ക്ലീനറാണ്. ജോസ് എന്നയാൾ വാഹനം ഓടിക്കാൻ സാധിക്കാത്ത വിധത്തിൽ മദ്യലഹരിയിലായിരുന്നുവെന്നാണ് ലഭിക്കുന്ന വിവരം. അതിനാലാണ് ക്ലീനറായ അലക്‌സ് ലോറി ഓടിച്ചത്. വാഹനമോടിച്ച സമയത്ത് മദ്യപിച്ചിരുന്നു. അതേസമയം അലക്‌സിന് ഹെവി വെഹിക്കിൾ ലൈസൻസ് ഉണ്ടായിരുന്നില്ല. രണ്ടുപേരെയും വലപ്പാട് പോലീസ് കസ്റ്റഡിയിലെടുത്തു.

ചൊവ്വാഴ്ച പുലർച്ചെ 3.50- നാണ് പണി പുരോഗമിക്കുന്ന ദേശീയപാതാ ബൈപ്പാസിനരികിൽ ഉറങ്ങിക്കിടക്കുകയായിരുന്ന നാടോടികൾക്കിടയിലേക്ക് ലോറി പാഞ്ഞുകയറിയത്. രണ്ടുകുട്ടികളുൾപ്പെടെ അഞ്ചുപേരാണ് തത്ക്ഷണം മരിച്ചത്. കാളിയപ്പൻ (50),ബംഗാഴി (20), നാഗമ്മ(39), ജീവൻ(4), വിശ്വ(1) എന്നിവരാണ് മരിച്ചത്. കണ്ണൂരിൽ നിന്ന് മരം കയറ്റി പോയിരുന്ന ലോറി ദേശീയ പാതയിൽ നിന്ന് ബൈപ്പാസിലേക്ക് നിയന്ത്രണം വിട്ട് പാഞ്ഞുകയറുകയായിരുന്നു. ദേശീയ പാതയിൽ സ്ഥാപിച്ചിരുന്ന ഡിവൈഡർ തകർത്താണ് ലോറി ഉറങ്ങിക്കിടന്നവർക്കിടയിലേക്ക് കയറിയത്.

മരിച്ചവർ സ്ഥിരമായി ഈ പ്രദേശത്ത് താമസിക്കുന്നവരാണ്. അപകടമുണ്ടാക്കിയത് മരം കയറ്റിയ വന്ന ലോറിയാണെന്നും ഏകദേശം മൂന്നര ടണ്ണോളം ലോഡ് വാഹനത്തിൽ ഉണ്ടായിരുന്നുവെന്നും പ്രദേശവാസി പറഞ്ഞു. റോഡിൽ നാടോടിസംഘത്തിലുള്ളവരെല്ലാം നിരന്ന് കിടക്കുകയായിരുന്നു. അവർക്കിടയിലേക്കാണ് ഡിവൈഡർ തകർത്ത ലോറി പാഞ്ഞുകയറിയത്. റോഡിൽ ശരീരഭാഗങ്ങൾ ചതഞ്ഞരഞ്ഞ നിലയിലായിരുന്നു.