പാര്‍ക്ക് ബ്രേക്കിട്ടില്ല; പുത്തന്‍ എസ്.യു.വി ഷോറൂമില്‍ നിന്ന് ഉരുണ്ട് റോഡിലേക്ക് പതിച്ചു

ചില അശ്രദ്ധകൾക്ക് കനത്ത വില കൊടുക്കേണ്ടി വരുമെന്ന് നാം പറയാറുണ്ട്. അത്തരത്തിൽ സാമാന്യം നല്ല വില കൊടുക്കേണ്ടി വന്ന ഒരു അശ്രദ്ധയുടെ വീഡിയോയാണ് സാമൂഹിക മാധ്യമങ്ങളിൽ ഇന്നത്തെ ഹിറ്റ്. കൊല്ലം നിലമേൽ പുതുശ്ശേരിയിലെ കിയ ഷോറൂമിലാണ് സംഭവം.

ഷോറൂമിൽ നിർത്തിയിട്ട കിയ സെൽറ്റോസ് എസ്.യു.വിയാണ് പിന്നിലേക്ക് ഉരുണ്ടത്. ഷോറൂമിലെ ഒരു ജീവനക്കാരൻ തുടക്കം മുതൽ വാഹനം നിർത്താനായി ശ്രമിക്കുന്നുണ്ടെങ്കിലും സാധിക്കുന്നില്ല. പാർക്ക് ബ്രേക്ക് ഇടാത്തതാണ് അപകടത്തിന് കാരണമായത്. പിന്നോട്ട് ഉരുണ്ട് പോയി ഷോറൂമിൽ നിന്ന് താഴ്ചയിൽ ഉള്ള റോഡിലേക്ക് വാഹനം പതിക്കുകയായിരുന്നു.
ഈ സമയത്ത് റോഡിൽ മറ്റ് വാഹനങ്ങളോ ആളുകളോ കടന്നുവരാതിരുന്നത് വലിയ അപകടം ഒഴിവാക്കിയത്. റോഡിലേക്ക് വീണ വാഹനം ഷോറൂം ജീവനക്കാർ തിരിച്ച് ഓടിച്ച് കയറ്റുന്നതും വീഡിയോയിൽ കാണാം.