സിനിമ താരങ്ങളെ ട്രോളാനുള്ള ഒരു അവസരവും സോഷ്യല്‍ മീഡിയയിലുള്ള സദാചാര പൊലീസ് പാഴാക്കാറില്ല. ബിക്കിനിയും ചെറിയ വസ്ത്രവും ധരിച്ചെന്ന് പറഞ്ഞ് നടിമാര്‍ നിരന്തരം അക്രമണങ്ങള്‍ക്ക് ഇരയാകാറുണ്ട്. എന്നാല്‍ സ്വന്തം മകള്‍ക്കൊപ്പമുള്ള ചിത്രത്തിന് ഇത്തരത്തില്‍ ആക്രമണം നേരിടേണ്ടിവന്നാലോ? ബോളിവുഡ് സൂപ്പര്‍ താരം അമീര്‍ ഖാനും മകള്‍ ഇറയ്ക്കുമാണ് ഇത്തരത്തിലുള്ള അക്രമണങ്ങള്‍ നേരിടേണ്ടി വന്നത്. അച്ഛനും മകളും തമ്മിലുള്ള മനോഹര നിമിഷമായിരുന്നു ചിത്രം. എന്നാല്‍ റംസാന്‍ സമയത്ത് ഇത്തരം ചിത്രം പോസ്റ്റ് ചെയ്യുന്നത് അനുചിതമാണെന്നാണ് സോഷ്യല്‍ മീഡിയയുടെ വാദം.
അമീറിന്റെ ബന്ധുവായ മന്‍സൂര്‍ ഖാന്റെ 60ാം പിറന്നാള്‍ ആഘോഷത്തില്‍ നിന്നും കുടുംബത്തോടൊപ്പമുള്ള മനോഹര ചിത്രങ്ങള്‍ താരം പോസ്റ്റ് ചെയ്തിരുന്നു. ഭാര്യ കിരണ്‍ റാവുവും മകള്‍ ഇറയും മകന്‍ ആസാദിനുമൊപ്പമുള്ളതായിരുന്നു ചിത്രങ്ങള്‍. ഇതില്‍ ഒരു ചിത്രമാണ് സോഷ്യല്‍ മീഡിയയില്‍ ഒരു വിഭാഗത്തിന് അംഗീകരിക്കാന്‍ പറ്റാതിരുന്നത്. നിലത്തു വീണു കിടക്കുന്ന അമീറിന്റെ മേലെ കയറിയിരിക്കുന്ന ഇറയുടെ ചിത്രമായിരുന്നു ഇത്.
ഫോട്ടോ കണ്ട് ഒരാള്‍ കമന്റ് ചെയ്തത് ഇങ്ങനെ; അമീര്‍ ഖാന്‍, മകളാണെങ്കില്‍ എന്താ, റംസാന്റെ സമയത്ത് ഇങ്ങനെ ഫോട്ടോ എടുക്കാതിരിക്കൂ. കൂടാതെ നിരവധി പേരാണ് വിമര്‍ശനവുമായി രംഗത്തെത്തിയിരിക്കുന്നത്. താങ്കളുടെ സിനിമകള്‍ ഇഷ്ടമാണെങ്കിലും ഇത് അംഗീകരിക്കാനാവില്ലെന്നാണ് ചിലരുടെ വാദം. വിമര്‍ശനങ്ങള്‍ക്കൊപ്പം അശ്ലീലം നിറഞ്ഞ കമന്റുകളും ചിത്രത്തിന് താഴെ വരുന്നുണ്ട്. എന്നാല്‍ മറ്റൊരു വിഭാഗം വിമര്‍ശകരെ പ്രതിരോധിക്കാനെത്തി. അച്ഛനും മകളും തമ്മിലുള്ള മനോഹര ബന്ധമാണിതെന്നും മതത്തെ ഇതിനിടയിലേക്ക് കൊണ്ടുവരരുതെന്നും ചിലര്‍ വ്യക്തമാക്കി. അമീറിന്റെ ആദ്യ ഭാര്യയിലുണ്ടായ മകളാണ് ഇറ.
Leave a Comment