കൊച്ചി:പൃഥ്വിരാജ് നായകനായെത്തുന്ന ‘നയന്‍’ന്റെ റിലീസ് തീയ്യതി പുറത്തു വിട്ടു. സയന്‍സ് ഫിക്ഷന്‍ ചിത്രമായ ‘നയന്‍’ നവംബര്‍ 16ന് തിയേറ്ററുകളില്‍ എത്തുമെന്നാണ് അണിയറപ്രവര്‍ത്തകര്‍ അറിയിച്ചിട്ടുള്ളത്. മോഹന്‍ലാലിന്റെ ‘ഒടിയന്’ ശേഷം പ്രകാശ് രാജ് ഒരു പ്രധാനവേഷത്തില്‍ എത്തുന്ന ചിത്രം കൂടിയാണിത്. പൃഥ്വിരാജ് സോണിപിക്ചേഴ്സുമായി ചേര്‍ന്ന് നിര്‍മ്മിക്കുന്ന ആദ്യ ചിത്രമെന്ന പ്രത്യേകതയും ‘നയനി’നുണ്ട്.
പഞ്ചാബി നടി വാമിഖ ഗബ്ബിയാണ് ചിത്രത്തില്‍ നായികയായി എത്തുന്നത്. മംമ്ത മോഹന്‍ദാസാണ് ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ആനി എന്നാണ് മംമ്തയുടെ കഥാപാത്രത്തിന്റെ പേര്. നിത്യാ മോനോനും പാര്‍വ്വതിയും ചിത്രത്തിലുണ്ടാകുമെന്നാണ് സ്ഥിരീകരിക്കാത്ത റിപ്പോര്‍ട്ടുകള്‍. മറ്റ് അഭിനേതാക്കളെക്കുറിച്ചുളള വിവരങ്ങള്‍ ഉടന്‍ പുറത്തു വിടുമെന്നും പൃഥ്വി വ്യക്തമാക്കിയിരുന്നു. ‘നയന്‍’ന്റെ മോഷന്‍ പോസ്റ്റര്‍ അടുത്തിടെ താരം ഫേസ്ബുക്കിലൂടെ പങ്കു വച്ചിരുന്നു.
സംവിധായകന്‍ കമലിന്റെ മകന്‍ ജെനൂസ് മുഹമ്മദാണ് ചിത്രം സംവിധാനം ചെയ്യുന്നത്. അഭിനന്ദന്‍ രാമാനുജനാണ് ഛായാഗ്രഹണം. പൃഥ്വിരാജും സുപ്രിയയും ചേര്‍ന്നാണ് പൃഥ്വിരാജ് പ്രൊഡക്ഷന്‍സ് എന്ന നിര്‍മാണ കമ്പനി തുടങ്ങിയത്.
Leave a Comment