വിജയവാഡ: പ്രമുഖ ടെലിവിന്‍ അവതാരകയെ തൂങ്ങിമരിച്ച നിലയില്‍ കണ്ടെത്തി. ആന്ധ്രാപ്രദേശിലെ സ്വകാര്യ ടെലിവിഷന്‍ അവതാരകയായ തേജസ്വിനിയാണു ഭര്‍ത്താവുമായുള്ള തര്‍ക്കത്തെ തുടര്‍ന്നു വീട്ടില്‍ തൂങ്ങി മരിച്ചത്. കൃഷ്ണ ജില്ലയിലാണു സംഭവം. എടുപ്പുഗള്ലുവിലെ വീട്ടില്‍ ഞായറാഴ്ചയായിരുന്നു സംഭവം.
എന്നാല്‍ വിവരം പുറംലോകാമറിഞ്ഞത് തിങ്കളാഴ്ചയാണ്. വിജയവാഡയിലെ ഒരു സ്വകാര്യ ചാനല്‍ അവതാരകയായിരുന്നു ഇവര്‍. മാതാപിതാക്കളുടെ എതിര്‍പ്പിനെ അവഗണിച്ച് തേജസ്വിനിയും ഭര്‍ത്താവ് പവന്‍ കുമാറും അഞ്ചു വര്‍ഷമായി ഒരുമിച്ചു താമസിച്ചു വരികയായിരുന്നു.
എന്നാല്‍ ഇവര്‍ തമ്മില്‍ ഏറെ നാളായി കലഹത്തിലായിരുന്നു എന്നു സൂചനയുണ്ട്. തുടര്‍ന്നു പവന്‍ കുമാര്‍ വീട്ടില്‍ ഇല്ലാതിരുന്ന സമയത്താണ് ഇവര്‍ ജീവനൊടുക്കിയത്. ഭര്‍ത്തൃമാതാവ് ഉച്ചഭക്ഷണത്തിനായി വിളിച്ചിട്ടും ഇവര്‍ വാതില്‍ തുറന്നില്ല. തുടര്‍ന്നു സംശയം തോന്നി പരിശോധിച്ചപ്പോള്‍ തേജസ്വിനിയെ അവശനിലയില്‍ കണ്ടെത്തുകയായിരുന്നു. സംശയകരമായ മരണത്തിനു പോലീസ് കേസ് എടുത്തു.
Leave a Comment