കസബയിലെ സ്ത്രീവിരുദ്ധ ഡയലോഗ് വേണ്ടിയിരുന്നില്ലെന്ന് നടി നൈലാ ഉഷ. റെഡ് എഫ്എമ്മില്‍ പരിപാടിയില്‍ പങ്കെടുത്ത് സംസാരിക്കുമ്പോള്‍ അവതാരകന്‍ ചോദിച്ച ചോദ്യത്തിന് മറുപടിയായിട്ടാണ് നൈല ഇക്കാര്യം പറഞ്ഞത്.
കുസൃതി ചോദ്യങ്ങള്‍ ചോദിച്ച് മുന്നോട്ടു പോകുമ്പോഴാണ് അവസാനമായി ഒരു സ്ത്രീവിരുദ്ധ ഡയലോഗ് കേട്ടത് എപ്പോഴാണെന്ന് അവതാരകന്‍ ചോദിക്കുന്നത്. അവസാനമായി കണ്ടത് എപ്പോഴാണെന്ന് ചോദിച്ചാല്‍ ഓര്‍മ്മയില്ല പക്ഷെ കസബയിലെ ഈ പ്രശ്നം വന്നപ്പോള്‍ ആ ലിങ്ക് തുറന്ന് നോക്കിയപ്പോള്‍ ഡയലോഗ് കേട്ടിരുന്നു. അത് കേട്ടപ്പോള്‍ അത് വേണ്ടിയിരുന്നില്ലെന്ന് തോന്നി. അത് ആര് പറഞ്ഞാലും, സ്ത്രീ പറഞ്ഞാലും പുരുഷന്‍ പറഞ്ഞാലും അത് കേള്‍ക്കാന്‍ ഒരു സുഖമുണ്ടായിരുന്നില്ല.
ഞാന്‍ ആ സിനിമ കണ്ടിട്ടില്ല. അത് കാണാതെ എനിക്ക് ആ സിനിമയെ റെയ്റ്റ് ചെയ്യാന്‍ സാധിക്കില്ല. ആ സിനിമയില്‍ അത്തരത്തിലൊരു ഡയലോഗ് ഉണ്ട് എന്നത് കൊണ്ട് ആ സിനിമ മോശമാണെന്ന് ഞാന്‍ പറയില്ല. നൈല പറഞ്ഞു.
നേരത്തെ ഇക്കാര്യം തുറന്നു പറഞ്ഞതിന് നടി പാര്‍വ്വതിക്കെതിരെ മോശം അഭിപ്രായമാണ് സോഷ്യല്‍മീഡിയയില്‍ ഉയര്‍ന്നുവന്നിരുന്നത്. എന്നാല്‍ താന്‍ പറഞ്ഞകാര്യങ്ങളില്‍ ഉറച്ചുനില്‍ക്കുകയാണെന്നും പൊതുസമൂഹത്തിന് മനസ്സിലാകുന്നതുവരെ അതു തുടര്‍ന്നുകൊണ്ടിരിക്കുമെന്നും നടി പിന്നീട് പറഞ്ഞു.
Leave a Comment