പത്തനംതിട്ട: പത്തനംതിട്ട നിയോജക മണ്ഡലത്തിലെ തന്റെ വിജയത്തില്‍ നൂറ് ശതമാനം ആത്മവിശ്വാസമുണ്ടെന്ന് എന്‍ഡിഎ സ്ഥാനാര്‍ത്ഥി കെ സുരേന്ദ്രന്‍. ഇടത്, വലത് മുന്നണികള്‍ പരാജയഭീതിയിലാണ്. ഇത് മനസിലാക്കിയാണ് കൊട്ടിക്കലാശ ദിവസം തന്റെ പ്രചാരണ വാഹനം തടഞ്ഞതെന്നും കെ സുരേന്ദ്രന്‍ പറഞ്ഞു. പൊന്‍കുന്നം, കാഞ്ഞിരപ്പള്ളി തുടങ്ങി പലയിടത്തും സിപിഎം പ്രവര്‍ത്തകര്‍ തന്നെ തടഞ്ഞുവച്ചു. പരാജയം ഉറപ്പായപ്പോള്‍ എതിരാളികള്‍ അക്രമത്തിന്റെ വഴിയിലാണെന്നും സുരേന്ദ്രന്‍ ആരോപിച്ചു.
മ്ലേച്ഛമായ വ്യക്തിഹത്യയും അശ്ലീല പ്രചാരണങ്ങളും ജാതി അധിക്ഷേപങ്ങളുമാണ് തെരഞ്ഞെടുപ്പ് പ്രചാരണകാലത്ത് തനിക്കെതിരെ ഉണ്ടായത്. എന്നാല്‍ പത്തനംതിട്ടയില്‍ നിന്ന് വിജയിക്കും എന്ന കാര്യത്തില്‍ സംശയമില്ലെന്നും കെ സുരേന്ദ്രന്‍ പറയുന്നു. നിശ്ശബ്ദ പ്രചാരണ ദിവസമായ ഇന്ന് പ്രചാരണത്തിനിടെ കാണാതെ വിട്ടുപോയവരെ കാണണം. എല്ലാ മണ്ഡലങ്ങളിലും ഇന്ന് ഒരു ഓട്ടപ്രതിക്ഷിണം നടത്താനാണ് ഉദ്ദേശിക്കുന്നത്.
