മുംബൈ: ഇന്ത്യയിലെ ജയിലുകള്‍ക്ക് നിലവാരം പോരെന്നും സുരക്ഷയില്ലെന്നും ചൂണ്ടിക്കാണിച്ച് രാജ്യത്തേയ്ക്ക് മടങ്ങാന്‍ വിസമ്മതിക്കുന്ന വിജയ് മല്യയെപ്പോലുള്ള വിഐപി കുറ്റവാളികള്‍ക്കായി രാജ്യത്ത് ആഡംബര ജയില്‍ ഒരുങ്ങുന്നു. മല്യയെപ്പോലുള്ള ഉന്നതരുടെ പരാതി കൂടി കണക്കിലെടുത്താണ് യൂറോപ്യന്‍ ശൈലിയിലുള്ള ജയില്‍ ഒരുങ്ങുന്നത്.മുംബൈ ആര്‍തര്‍ റോഡ് ജയിലിലാണ് ആധുനിക സൗകര്യങ്ങളോടെ സെല്ലുകള്‍ തയ്യാറാകുന്നത്. എല്ലാ മനുഷ്യാവകാശ മാനദണ്ഡങ്ങളും പാലിച്ചു കൊണ്ടായിരിക്കും സെല്ലുകളുടെ നിര്‍മാണം.
വിജയ് മല്യയ്ക്ക് പുറമെ സാമ്പത്തിക തട്ടിപ്പ് നടത്തി രാജ്യത്തുനിന്ന് മുങ്ങിയ നീരവ് മോദി, മെഹുല്‍ ചോക്‌സി തുടങ്ങിയവരെയും ഉദ്ദേശിച്ചാണ് ആധുനിക സെല്ലുകള്‍ ഒരുങ്ങുന്നതെന്നാണ് റിപ്പോര്‍ട്ടുകള്‍.
ജയില്‍ വളപ്പിലെ പഴയ കെട്ടിടങ്ങള്‍ പൊളിച്ചുമാറ്റിയ ശേഷമായിരിക്കും ഒരാള്‍ക്ക് മാത്രമായുള്ള ആധുനിക ജയില്‍ മുറികള്‍ സ്ഥാപിക്കുക. സാധാരണ ജയിലുകളില്‍ നിന്ന് വ്യത്യസ്തമായി നല്ല കാറ്റും വെളിച്ചവും ഉള്ളതായിരിക്കും പുതിയ ജയില്‍മുറികള്‍.
രാജ്യത്തിന് കോടികളുടെ നഷ്ടമുണ്ടാക്കി മുങ്ങിയ പ്രതികള്‍ കീഴടങ്ങാന്‍ മടിക്കുന്നത് ജയിലുകളുടെ മോശം അവസ്ഥ മൂലമാണെന്നും ഇതിന് മാറ്റമുണ്ടാകണമെന്നും മഹാരാഷ്ട്രയിലെ ഒരു ഉന്നത സര്‍ക്കാര്‍ ഉദ്യോഗസ്ഥന്‍ പറഞ്ഞു.
ആധുനിക ജയില്‍ മുറികളില്‍ യൂറോപ്യന്‍ ശൈലിയിലുള്ള ശുചിമുറികളും പ്രത്യേക വാഷ് ബേസിനും ഷവറുമുണ്ടാകും.
Leave a Comment