തിരുവനന്തപുരം: കേരള കോണ്‍ഗ്രസിലെ ബാലകൃഷ്ണപിള്ള വിഭാഗവും സ്‌കറിയ തോമസ് വിഭാഗവും ലയിക്കുന്നു. എല്‍ഡിഎഫ് പ്രവേശത്തിന് വഴിയൊരുക്കാനാണ് ലയന നീക്കം. ഇതു സംബന്ധിച്ച് മുഖ്യമന്ത്രിയുമായി ബാലകൃഷ്ണപിള്ളയും സ്‌കറിയ തോമസും കൂടിക്കാഴ്ച്ച നടത്തി.
കൊല്ലം ഗസ്റ്റ് ഹൗസിലായിരുന്നു കൂടികാഴ്ച്ച. എല്‍ഡിഎഫിലേക്ക് പുതിയ കക്ഷികളെ ഉള്‍ക്കൊള്ളിക്കാന്‍ സിപിഎം തീരുമാനിച്ചതിനു പിന്നാലെയാണ് എല്‍ഡിഎഫുമായി സഹകരിക്കുന്ന രണ്ടു വിഭാഗങ്ങള്‍ ലയിച്ച് ഒന്നാകാന്‍ തീരുമാനിച്ചിരിക്കുന്നത്. ലയനം വ്യക്തമാക്കികൊണ്ട് ഇരുനേതാക്കളും നാളെ സംയുക്ത വാര്‍ത്താസമ്മേളനം വിളിച്ചിട്ടുണ്ട്.
രാവിലെ 11 മണിക്ക് തിരുവനന്തപുരത്താണ് വാര്‍ത്താസമ്മേളനം. പുതിയ പാര്‍ട്ടിയുടെ പേര്, നയങ്ങള്‍ തുടങ്ങിയ കാര്യങ്ങള്‍ ചൊവ്വാഴ്ച തിരുവനന്തപുരത്ത് നടത്തുന്ന സംയുക്ത വാര്‍ത്താസമ്മേളനത്തില്‍ പ്രഖ്യാപിക്കും.
