കൊച്ചി: ഒറ്റയ്ക്ക് നടന്നു പോകുന്ന സ്ത്രീകളെ ബൈക്കിലെത്തിയ ശേഷം കടന്നു പിടിക്കുകയും അസഭ്യം പറയുകയും ചെയ്യുന്ന യുവാവ് പിടിയില്‍. ഏറെ നാളായി നാട്ടുകാര്‍ക്കും പോലീസിനും തലവേദനയായി മാറിയ ‘ഗോസ്റ്റ് റൈഡര്‍’ ആണ് പോലീസിന്റെ വലയിലായത്.
പാലാരിവട്ടം പൈപ്പ് ലൈന്‍ റോഡ് പാടിവട്ടം കര്‍ത്തനാംപറമ്പില്‍ നിഖില്‍ ബാബു(25) വിനെയാണ് പാലാരിവട്ടം പൊലീസ് അറസ്റ്റ് ചെയ്തത്. ഒറ്റയ്ക്ക് നടന്നുപോകുന്ന സ്ത്രീകളെ ബൈക്കില്‍ ചുറ്റിനടന്നു കടന്നുപിടിച്ച് അപമാനിക്കുകയും അസഭ്യം പറയുകയും ചെയ്യുകയായിരിന്നു യുവാവിന്റെ പരിപാടി.
ഇയാള്‍ക്ക് ‘ഗോസ്റ്റ് റൈഡര്‍’ എന്ന് പേരിട്ടത് പോലീസാണ്. രാവിലെ ദേവാലയങ്ങളിലേക്കും പ്രഭാത സവാരിക്കും തനിച്ച് ഇറങ്ങുന്നവരും വൈകീട്ട് ജോലി കഴിഞ്ഞു മടങ്ങുന്നവരുമായ സ്ത്രീകളും യുവതികളുമാണ് പ്രതിയുടെ ഉപദ്രവത്തിനിരയായിരുന്നത്.
അസി.കമ്മീഷണര്‍ കെ.ലാല്‍ജിയുടെ നിര്‍ദേശ പ്രകാരം സബ് ഇന്‍സ്പെക്ടര്‍മാരായ എസ്.സനല്‍, വി.എന്‍.ജിബി, സീനിയര്‍ സിവില്‍ പൊലീസ് ഓഫീസര്‍ ഗിരീഷ് കുമാര്‍, സിവില്‍ പൊലീസ് ഓഫീസര്‍മാരായ മാഹിന്‍, പി.ബി.അനീഷ്, ടി.ആര്‍.രതീഷ് എന്നിവര്‍ ഉള്‍പ്പെട്ട അന്വേഷണ സംഘമാണ് പ്രതിയെ വലയിലാക്കിയത്.
