പ്രതാപം ഒട്ടും നഷ്ടപ്പെടാതെ തന്നെ ‘ജിമിക്കി കമ്മല്‍’ ഗാനം യുട്യൂബില്‍ തിരിച്ചെത്തി!!! ഷാന്‍ റഹ്മാന്റെ പ്രതിഷേധം ഫലംകണ്ടു

കോപ്പിറൈറ്റ് പ്രശ്‌നത്തെ തുടര്‍ന്ന് യൂട്യൂബില്‍ നിന്ന് പിന്‍വലിച്ച ജിമിക്കി കമ്മല്‍ ഗാനം വീണ്ടും തിരിച്ചെത്തി. 8 കോടി 12 ലക്ഷത്തില്‍ പരം കാഴ്ച്ചക്കാരുടെ പ്രതാപത്തോടുകൂടി തന്നെയാണ് ഗാനം തിരിച്ചെത്തിയിരിക്കുന്നത്. ഗാനം പിന്‍വലിച്ചതിനെതിരായി സംഗീതസംവിധായകന്‍ ഷാന്‍ റഹ്മാന്‍ സോഷ്യല്‍ മീഡിയയില്‍ നടത്തിയ പ്രതികരണത്തിനു പിന്നാലെയാണ് സത്യം ഓഡിയോസ് പാട്ട് തിരികെയെത്തിച്ചത്.

അടുത്തകാലത്ത് മലയാളം കണ്ട ഏറ്റവും വലിയ ഹിറ്റ് ഗാനമായ ഇത് കോപ്പിറൈറ്റ് പ്രശ്നവുമായി ബന്ധപ്പെട്ടാണ് പിന്‍വലിക്കേണ്ടി വന്നത്. ഗാനം യൂട്യൂബില്‍ അപ് ചെയ്ത സ്വകാര്യ കമ്പനിക്കെതിരെ ചാനല്‍ നല്‍കിയ പരാതിയിലായിരുന്നു നടപടി. യുട്യൂബില്‍ നിന്ന് മാത്രമേ ജിമിക്കി കമ്മല്‍ എടുത്തു മാറ്റാന്‍ സാധിക്കൂ. ആസ്വാദകരുടെ ഹൃദയത്തില്‍ ജിമിക്കി കമ്മല്‍ എന്ന ഗാനം എന്നും നില നില്‍ക്കുമെന്നും സംഗീത സംവിധായകന്‍ ഷാന്‍ റഹ്മാന്‍ സോഷ്യല്‍മീഡിയയില്‍ പ്രതികരിച്ചിരുന്നു.

ഷാന്‍ റഹ്മാന്റെ കുറിപ്പ്

‘ജിമിക്കി കമ്മല്‍ നീക്കം ചെയ്യപ്പെട്ടതിനെക്കുറിച്ച് പറയാന്‍ നിരവധി പേര്‍ എന്നോട് ആവശ്യപ്പെട്ടു. 80 മില്യണോ അതിനു മുകളിലോ ആളുകളാണ് ഈ ഗാനം സോഷ്യല്‍ മീഡിയയില്‍ കണ്ടത്. കൃത്യമായ കണക്ക് ഓര്‍മയില്ല. കോപ്പി റൈറ്റ് നിയമ പ്രകാരം ഈ ഗാനം യൂട്യൂബില്‍ നിന്ന് ഇപ്പോള്‍ നീക്കം ചെയ്തിരിക്കുകയാണ്. ഒരു സ്വകാര്യ ചാനല്‍ ഈ സിനിമയുടെ പകര്‍പ്പാവകാശം ഏറ്റെടുത്തതാണ് ഇതിന് കാരണമെന്നും അറിയുന്നു. ഈ വിഷയത്തെ പറ്റി എന്റെ അഭിപ്രായം ഇതാണ്.

മലയാള സിനിമയുടെ ചരിത്രത്തില്‍ തന്നെ ഏറ്റവും കൂടുതല്‍ ആളുകള്‍ കണ്ട വിഡിയോ ആണ് ജിമിക്കി കമ്മല്‍. വെറും ഒരു ബിസിനസ് കരാറിന്റെ ഭാഗമായി മാത്രമാണ് ഇപ്പോള്‍ യുട്യൂബില്‍ നിന്ന് എടുത്തുമാറ്റിയത്. ‘മാണിക്യ മലരായാ പൂവി’ എന്ന ഗാനമാണ് ജിമിക്കി കമ്മലിന് ശേഷം ഇത്രയധികം ശ്രദ്ധ പിടിച്ചു പറ്റിയത്. 74 മില്യണ്‍ ആളുകള്‍ ഇപ്പോള്‍ ഈ ഗാനം കണ്ടു കഴിഞ്ഞു. ജിമിക്കി കമ്മലിന്റെ റെക്കോര്‍ഡിലേക്ക് ഈ ഗാനം ഉടനെത്തും. എന്നാല്‍ ഇപ്പോഴത്തെ വിഷയം അതല്ല. ജിമിക്കി കമ്മല്‍ എന്നത് മലയാളിയുടെ അഭിമാന പ്രൊജക്ട് ആയിരുന്നു. കാരണം ലോകം ആസ്വദിച്ചതാണ് ഈ ഗാനം. ഇന്ത്യയിലെ ജനങ്ങള്‍ ഒന്നടങ്കം ഈ മലയാള ഗാനത്തിന് ചുവടുവച്ചതാണ്.

എന്തുതന്നെയായാലും ജിമിക്കി കമ്മല്‍ എന്നത് ഒരു ഗംഭീര ഗാനം തന്നെയായിരുന്നു. എന്റെ മനസ്സിലും ഓരോ മലയാളിയുടെ മനസ്സിലും ആ ഗാനം എന്നും ഉണ്ടാകും. ജിമിക്കി കമ്മല്‍ യുട്യൂബില്‍ നിന്ന് എടുത്തു മാറ്റാന്‍ മാത്രമേ നിങ്ങള്‍ക്ക് സാധിക്കൂ. പ്രേക്ഷക ഹൃദയത്തില്‍ ആ ഗാനത്തിന് എന്നും ഒരു സ്ഥാനം ഉണ്ട്.

SHARE