ഹിന്ദുക്കള്‍ സ്വയരക്ഷയ്ക്കായി വീടുകളില്‍ വാള്‍ കരുതിവയ്ക്കണം; ഭാവിയില്‍ മുസ്ലീങ്ങളുമായി യുദ്ധത്തിന് സാധ്യത; കേരളത്തില്‍ ഹിന്ദുക്കള്‍ 50 ശതമാനത്തില്‍ താഴെയായി; വിദ്വേഷ പ്രസംഗവുമായി ശ്രീരാമസേന തലവന്‍

മംഗളൂരു: രാജ്യത്തെ ഹിന്ദുക്കള്‍ വീടുകളില്‍ വാള്‍ കരുതി വെയ്ക്കണമെന്ന് ശ്രീരാമസേനാ തലവന്‍ പ്രമോദ് മുത്തലിക്. ഭാവിയില്‍ മുസ്‌ളീമുമായി തെരുവ് യുദ്ധത്തിന് സാധ്യതയുണ്ടെന്നും അദ്ദേഹം പറഞ്ഞു. ഇപ്പോള്‍ ഹിന്ദുക്കള്‍ക്ക് മോശം സമയമാണെന്നും അഴിമതി, നിഷ്ഠൂരത, ഭീകരത എന്നിവയില്‍ നിന്നുള്ള സ്വയരക്ഷയ്ക്കായി ആയുധം കരുതി വയ്‌ക്കേണ്ടത് അത്യാവശ്യമാണെന്നും രാജ്യത്തെ രക്ഷിക്കാന്‍ ഹിന്ദുസമൂഹം ദുര്‍ഗ്ഗാമാതാവ് ആകണമെന്നുമാണ് ഹിന്ദുനേതാവ് തന്റെ വര്‍ഗീയ വിദ്വേഷമുണ്ടാക്കുന്ന പ്രസംഗത്തില്‍ പറയുന്നത്.മംഗലുരു കദ്രിയില്‍ ശ്രീരാമ സേനയും ദുര്‍ഗാസേനയും സംയുക്തമായി സംഘടിപ്പിച്ച മാതൃപൂജയില്‍ ആയിരുന്നു മുത്തലികിന്റെ വിദ്വേഷപ്രസംഗം അരങ്ങേറിയത്. ഹിന്ദു പെണ്‍കുട്ടികളെ ലൗജിഹാദില്‍ പെടുത്തി മുസഌങ്ങള്‍ മതം മാറ്റുകയാണ്. ഇത്തരം കാര്യങ്ങളില്‍ ഹിന്ദു പെണ്‍കുട്ടികള്‍ പെടാതെ സൂക്ഷിക്കണം. ബാബറി മസ്ജിദ് തകര്‍ത്തിട്ട് ഇത്രയും വര്‍ഷമായിട്ടും അയോദ്ധ്യയില്‍ ശ്രീരാമക്ഷേത്രം നിര്‍മ്മിക്കാന്‍ കഴിഞ്ഞിട്ടില്ല. ഇതിന് കാരണം മുസഌങ്ങളാണ്. അവരാണ് ക്ഷേത്ര നിര്‍മ്മാണത്തിന് തടസ്സം. അവര്‍ തന്നെയാണ് ഗോവധ നിരോധന ബില്ലിനും തടസ്സം. വന്ദേമാതരം പാടാനും അവര്‍ക്ക് താല്‍പ്പര്യമില്ല.

കേരളത്തില്‍ ഹിന്ദുക്കള്‍ 50 ശതമാനത്തില്‍ താഴെയായി കുറഞ്ഞു. രാജ്യത്തുടനീളം മുസഌങ്ങള്‍ പള്ളി പണിതപ്പോള്‍ മിണ്ടാതെ അനുവാദം നല്‍കിയവര്‍ ആണ് ഹിന്ദുക്കള്‍. ഇനി അവര്‍ ഗോവധം നിര്‍ത്തി അയോദ്ധ്യയില്‍ രാമക്ഷേത്ര നിര്‍മ്മാണത്തിന് വഴിയൊരുക്കുകയാണ് വേണ്ടതെന്നും പ്രമോദ് മുത്താലിക് പറഞ്ഞു. രാമക്ഷേത്രത്തിന് എതിര് നില്‍ക്കുന്ന മുസഌങ്ങള്‍ക്ക് എതിരേ ഹിന്ദുക്കള്‍ സാമ്പത്തിക ബഹിഷ്‌ക്കരണം കൊണ്ടുവരണം അവരുമായി ഒരു വ്യാപാരബന്ധവും പാടില്ലെന്നും പറഞ്ഞു.

ഉഡുപ്പി ശ്രീരാമകൃഷ്ണ മഠത്തില്‍ ഇഫ്താര്‍ പാര്‍ട്ടി നടത്താനുള്ള പേജാവര്‍ മഠാധിപതിയുടെ നീക്കത്തിനെതിരേ ബംഗലുരു ആനന്ദറാവു സര്‍ക്കിളിന് സമീപമുള്ള ഗാന്ധിപ്രതിമയ്ക്ക് മുന്നില്‍ പ്രതിഷേധം നടത്തിയ പ്രമോദ് മുത്താലികിനും അനുയായികള്‍ക്കുമെതിരേ ജൂലൈയില്‍ പോലീസ് സ്വമേധയാ കേസെടുത്തിരുന്നു. ക്ഷേത്രങ്ങളിലും പരിസരങ്ങളിലും ഇഫ്ത്താര്‍ വിരുന്നുകള്‍ സംഘടിപ്പിച്ചാല്‍ ചോരയൊഴുക്കണമെന്ന് പ്രതിഷേധത്തില്‍ പറഞ്ഞിരുന്നു.

2014 ല്‍ ഗര്‍ഭാ പരിപാടികളില്‍ ഇസഌമികളെ നിരോധിക്കണമെന്ന് അഭിപ്രായപ്പെട്ടും മുത്താലിക്ക് വിവാദം വിളിച്ചു വരുത്തി. പരിപാടിയില്‍ പങ്കെടുക്കുന്നവര്‍ മുസഌങ്ങളാണോ എന്നറിയാന്‍ ഐഡന്റിറ്റി കാര്‍ഡ് സംഘാടകര്‍ നിര്‍ബ്ബന്ധമായി പരിശോധിക്കണമെന്നും സെലിബ്രിട്ടികളാണെങ്കില്‍ പോലും അവര്‍ മുസ്‌ളീങ്ങളാണെങ്കില്‍ അവരോട് പരിപാടി നടത്തേണ്ടെന്ന് പറയണമെന്നും പറഞ്ഞിരുന്നു. പ്രമോദ് മുത്തലികിന്റെ പ്രസംഗത്തിനെതിരേ സമൂഹത്തിന്റെ വിവിധ ഭാഗങ്ങളില്‍നിന്ന് വ്യാപക പ്രതിഷേധമാണ് ഉയരുന്നത്.

SHARE