സാമ്പത്തിക വളര്‍ച്ച തിരിച്ചുവരവില്‍; ഉയര്‍ച്ച ദൃശ്യമായി തുടങ്ങി; കേന്ദ്രസര്‍ക്കാരിന് ആശ്വാസമേകുന്ന പ്രസ്താവനയുമായി റിസര്‍വ് ബാങ്ക് ഗവര്‍ണര്‍

മുംബൈ: സാമ്പത്തിക വളര്‍ച്ച പിന്നോട്ടടിക്കുന്നുവെന്ന വാര്‍ത്തകള്‍ക്കിടെ മോദി സര്‍ക്കാരിന് ആശ്വാസമേകുന്ന പ്രസ്താവനയുമായി റിസര്‍വ് ബാങ്ക് ഗവര്‍ണര്‍ ഉര്‍ജിത് പട്ടേല്‍; ഈ സാമ്പത്തികവര്‍ഷത്തിന്റെ അവസാനത്തെ രണ്ടു പാദങ്ങളില്‍ ഇന്ത്യന്‍ സമ്പദ് വ്യവസ്ഥയില്‍ ഉയര്‍ച്ചയുണ്ടാകുമെന്നതിന്റെ സൂചനകള്‍ കണ്ടുതുടങ്ങിയെന്ന് റിസര്‍വ് ബാങ്ക് ഗവര്‍ണര്‍ പറയുന്നത്. സാമ്പത്തിക വളര്‍ച്ച ഏഴ് ശതമാനം കവിയുമെന്നും അദ്ദേഹം പ്രവചിക്കുന്നു. ‘ലൈവ് മിന്റി’ന് നല്‍കിയ അഭിമുഖത്തിലാണ് ഉര്‍ജിത് പട്ടേല്‍ ഇക്കാര്യം വ്യക്തമാക്കിയത്.
സാമ്പത്തിക വളര്‍ച്ച സംബന്ധിച്ച് തീര്‍ച്ചയായും റിസര്‍വ് ബാങ്കിന് പദ്ധതികളുണ്ട്. സാമ്പത്തിക വളര്‍ച്ചയ്ക്ക് കോട്ടം തട്ടാതെതന്നെ പണപ്പെരുപ്പ നിരക്ക് പിടിച്ചുനിര്‍ത്തുക എന്നതാണ് ലക്ഷ്യം. ഇന്ത്യയെപ്പോലുള്ള സമ്പദ് വ്യസ്ഥയെ സംബന്ധിച്ചിടത്തോളം, അനുയോജ്യമായ പലിശ നിരക്ക് നിക്ഷേപം വര്‍ധിപ്പിക്കുന്നതിന് അനിവാര്യമാണെന്നും അദ്ദേഹം പറഞ്ഞു.
സാമ്പത്തിക രംഗത്ത് ഉയര്‍ച്ച ദൃശ്യമായിത്തുടങ്ങിയിട്ടുണ്ട്. വാണിജ്യമേഖലയില്‍ ഓഗസ്റ്റിനെ അപേക്ഷിച്ച് മൂന്ന് ശതമാനത്തിന്റെ വര്‍ധനയുണ്ടായിട്ടുണ്ട്. വ്യാവസായികോല്‍പാദനത്തില്‍ 4.9 ശതമാനവും വര്‍ധനയുണ്ടായി. വാഹനവിപണിയില്‍ അടക്കം പുതിയ മുന്നേറ്റം കാണാനാവുമെന്നും ഉര്‍ജിത് പട്ടേല്‍ പറഞ്ഞു.
ഏപ്രില്‍- ജൂണ്‍ പാദത്തില്‍ സാമ്പത്തിക വളര്‍ച്ച 5.7 ശതമാനമായി കുറഞ്ഞ് മൂന്നു വര്‍ഷത്തെ താഴ്ചയിലെത്തിയിരുന്നു. ഈ മാസം ആദ്യം അടിസ്ഥാന വായ്പാ നിരക്കുകളില്‍ മാറ്റം വരുത്താതെ റിസര്‍വ് ബാങ്ക് വായ്പാ നയം പ്രഖ്യാപിച്ചിരുന്നു. റിസര്‍വ് ബാങ്ക് ഇക്കൊല്ലത്തെ സാമ്പത്തിക വളര്‍ച്ചാ നിരക്ക് 6.7 ശതമാനമായാണ് പുനര്‍നിര്‍ണയിച്ചിരിക്കുന്നത്. രാജ്യത്തിന്റെ വളര്‍ച്ചയെ തകര്‍ക്കുന്ന നടപടികളാണ് മോദി സര്‍ക്കാര്‍ സ്വീകരിക്കുന്നതെന്ന വ്യാപക ആരോപണങ്ങളാണ് ഉയര്‍ന്നുകൊണ്ടിരിക്കുന്നത്. ജിഎസ്ടിയും ഡീ മോണിറ്റൈസേഷനും രാജ്യത്തെ പിന്നോട്ടടിച്ചെന്ന സാമ്പത്തിക വിദഗ്ധരടക്കം വിലയിരുത്തിയതോടെ സര്‍ക്കാര്‍ പ്രതിസന്ധിയിലായിരിക്കുകയാണ്. അതേസമയം മാന്ദ്യം താല്‍ക്കാലികമാണെന്നും ഭാവിയിലെ വന്‍ നേട്ടത്തിന് ഇത് കാരണമാകുമെന്നുമാണ് കേന്ദ്രത്തിന്റെ നിലപാട്.

SHARE