എബ്രഹാം എസ്ര മോഹന്‍ലാല്‍ തന്നെയോ? ഇതാ ഉത്തരം

എബ്രഹാം എസ്ര മോഹന്‍ലാല്‍ തന്നെയോ? ‘എസ്രയുടെ ആദ്യ ട്രെയിലര്‍ പുറത്തുവന്നതുമുതലായിരുന്നു ആ പ്രചാരണം. ചിത്രത്തിലെ അമാനുഷികശക്തിയായ എബ്രഹാം എസ്രയായി എത്തുന്നത് സൂപ്പര്‍താരം മോഹന്‍ലാലാണ്. ആരാണ് ആദ്യമായി ഇതു കണ്ടെത്തിയതെന്നും എഴുതിയതെന്നുമറിയില്ല എങ്കിലും സോഷ്യല്‍ മീഡിയകളില്‍ വിഷയം കത്തിക്കയറി. സുഹൃത്തുക്കളുടെയും പരിചയക്കാരുടെയും ഉത്തരം തേടിയുള്ള വിളികള്‍ വന്നുകൊണ്ടിരുന്നു. സ്വപ്നംപോലെ എനിക്കുചുറ്റും എന്തെല്ലാമൊക്കെയോ നടക്കുന്നതായി തോന്നി. എന്റെ സിനിമയില്‍ ലാലേട്ടനും, പൃഥ്വിരാജിനൊപ്പം ലാലേട്ടന്‍ കൂടി എസ്രയില്‍ ഉണ്ടായിരുന്നെങ്കിലെന്ന് ഒരു നിമിഷം ഞാനും ആഗ്രഹിച്ചുപോയെന്ന് സംവിധായകന്‍ ജയ്കെ.എസ്രയില്‍ മോഹന്‍ലാലുണ്ടെന്ന വാര്‍ത്തയോട് ആദ്യമായി പ്രതികരിക്കുകയായിരുന്നു സംവിധായകന്‍.
ടീസറില്‍ പ്രത്യക്ഷപ്പെട്ട തോള്‍ ചെരിഞ്ഞുനില്‍ക്കുന്ന വ്യക്തിയെ ചൂണ്ടിക്കാണിച്ചാണ് എസ്രയില്‍ മോഹന്‍ലാലുണ്ടെന്ന വാദം ചിലര്‍ ഉറപ്പിച്ചത്. ടീസറിലെ തിരിഞ്ഞുനിന്ന ആ വ്യക്തി ചിത്രത്തിലെ നായകനായ പൃഥ്വിരാജ് തന്നെയാണ്. വിക്കിപ്പീഡിയ നല്‍കിയ സിനിമയുടെ വിവരങ്ങളില്‍ ലാലേട്ടന്റെ പേര് ആദ്യം വന്നിരുന്നെന്ന് ചിലര്‍ പറയുന്നു. ഇതെങ്ങനെ സംഭവിച്ചു എന്നെനിക്കറിയില്ല. എസ്രയില്‍ മോഹന്‍ലാല്‍ ഇല്ല-സംവിധായകന്‍ വിശദീകരിച്ചു.

പ്രേതത്തെ കണ്ട് ഭയന്നു വീഴുന്ന ഹാസ്യതാരങ്ങളെ പ്രതീക്ഷിച്ചാരും എസ്രയ്ക്ക് ടിക്കറ്റെടുക്കേണ്ടതില്ലെന്ന് അണിയറ പ്രവര്‍ത്തകര്‍ പറയുന്നു. ജൂത നാടോടികഥകളില്‍ നിന്നെടുത്ത ഒരു മിത്തില്‍ നിന്നാണ് കഥയുടെ ചുരുളഴിയുന്നത്. കഥയോടുള്ള താത്പര്യമാണ് പൃഥ്വിരാജ് ഉള്‍പ്പെടെയുള്ള താരങ്ങളെ ചിത്രത്തിലേക്ക് അടുപ്പിച്ചത്. അമേരിക്കയില്‍ താമസിക്കുന്ന ബാബു ആന്റണിയോട് ഫോണിലാണ് കഥാപാത്രത്തെക്കുറിച്ച് പറഞ്ഞത്. കഥ ഇഷ്ടപ്പെട്ട ബാബു ആന്റണി ചിത്രത്തിലെ വേഷം ചെയ്യാനായി അമേരിക്കയില്‍ നിന്ന് മുബൈയിലെത്തുകയായിരുന്നു.
രണ്ടു വര്‍ഷത്തോളം എടുത്താണ് എഴുത്തുജോലികള്‍ പൂര്‍ത്തിയാക്കിയത്. സിനിമാസമരം കാരണം ചിത്രത്തിന്റെ റിലീസ് നീട്ടിയപ്പോള്‍ സ്പെഷ്യല്‍ ഇഫക്റ്റുകളില്‍ കൂടുതല്‍ കൃത്യത കൊണ്ടുവരാന്‍ കൂടുതല്‍ സമയം കിട്ടിയതായി ജയ്കെ പറയുന്നു. ഗ്രാഫിക്സുകളിലും കലാസംവിധാനത്തിലും പുതുമകള്‍ സമ്മാനിക്കുന്ന ചിത്രമാകും എസ്രയെന്നാണ് ഈ മേഖലയില്‍ പ്രവര്‍ത്തിക്കുന്നവരുടെ വാദം.
ജൂത പശ്ചാത്തലത്തില്‍ കേരളത്തില്‍ നടക്കുന്ന ഒരു കഥയാണ് ചിത്രം പറയുന്നത്. മുബൈയില്‍ നിന്നും കൊച്ചിയിലേക്ക് സ്ഥലംമാറിയെത്തുന്ന ഷിപ്പിങ് കമ്പനിയിലെ ചീഫ് എക്സിക്യുട്ടീവ് ഓഫീസര്‍ രഞ്ജന്‍ മാത്യുവായാണ് പൃഥ്വിരാജ് ചിത്രത്തില്‍ വേഷമിടുന്നത്. നായകനും കുടുംബത്തിനും ഇവിടെ നേരിടേണ്ടിവരുന്ന ചില വിചിത്ര അനുഭവങ്ങളിലൂടെയാണ് ചിത്രം കടന്നുപോകുന്നത്. പ്രണയം, ഭീതി എന്നിവയെല്ലാം പ്രകടിപ്പിക്കുന്ന ജീവിതങ്ങള്‍ സിനിമയില്‍ കാണാം.
ജൂതപുരോഹിതന്‍ ബന്യാമായി ബാബു ആന്റണിയും പോലീസ് ഉദ്യോഗസ്ഥനായി ടൊവിനോവും ക്രിസ്തീയ പുരോഹിതനായി വിജയരാഘവനും ചിത്രത്തിലുണ്ട്.
ഇംഗ്ലീഷ് വിംഗ്ലീഷ് എന്ന ചിത്രത്തില്‍ ശ്രീദേവിക്കൊപ്പം അഭിനയിച്ച പ്രിയ ആനന്ദാണ് എസ്രയിലെ നായിക. സുദേവ് നായര്‍, പ്രതാപ് പോത്തന്‍ എന്നിവര്‍ പ്രധാന വേഷങ്ങളിലുണ്ട്.

SHARE